WAKULIMA NA WAFUGAJI WATEMBELEA MAONESHO YA NANENANE VIWANJA VYA NYAMHONGOLO

Posted on: August 6th, 2025

Halmashauri ya Wilaya ya Nyang’hwale imewapeleka wakulima na Wafugaji wa Wilaya ya Nyang’hwale kujifunza mbinu za Kilimo bora kwenye Maonesho ya Kilimo na Sherehe za Wakulima nanenane yanayofanyika Viwanja vya Nyamhongolo, Mwanza.

Wakulima wakipata maelezo ya kitaalamu kuhusu zao la mahindi

Wakulima na Wafugaji hao wamepata fursa ya kutembelea mabanda ya Taasisi  mbalimbali zinazojihusisha na Utafiti wa Mazao ya kilimo, zana za kilimo, teknolojia bora za kilimo na ufugaji bora.

Mkulima kutoka Kijiji cha Itetemia, Kata ya Nyabulanda, Nd. Emanuel Ezekiel amesema anamshukuru Mkurugenzi Mtendaji wa Halmashauri ya Wilaya ya Nyang’hwale kwa ubunifu wa kuwawezesha wakulima na wafugaji wa Nyang’hwale kwenda kujifunza Kilimo bora kwenye maonesho hayo.

Ndg. Ezekiel amesema kuwa, yeye binafsi amejifunza mambo mengi na kilichomvutia zaidi ni elimu juu mbinu za kilimo bora cha zao la mahindi ambapo amegundua kuwa alikua akilima kiholela bila kufuata kanuni na misingi ya kilimo bora na chenye tija.

“Tunashauriwa kulima kwa kufuata misingi ya wataalamu wa kilimo ikiwa ni pamoja na kuandaa mashamba vizuri, kutumia mbegu bora, na kutumia mbolea sahihi ili tuondokane na kulima maeneo makubwa yasiyo na tija” Ameeleza.

Mkulima kutoka Kijiji cha Nyarubere amesema pamoja na mambo mengine, wamejifunza mbinu za kilimo bora zinazojumuisha kufahamu aina za mbegu, muda sahihi wa mbegu kupandwa, muda sahihi wa mbegu kukaa kwenye vitalu, na matumizi sahihi ya aina zote za mbolea.

Halmashauri ya Wilaya ya Nyang’hwale kila mwaka hushiriki kwenye Sherehe za Wakulima na Maonesho ya Kilimo Nanenane ambapo kwa Mwaka 2025 maonesho hayo yanchagizwa na kaulimbiu isemayo

“Chagua Viongozi Bora kwa Maendeleo ya Kilimo, Mifugo na Uvuvi 2025”