MILIONI 300 KUVINUFAISHA VIKUNDI VYA VIJANA, WANAWAKE, NA WENYE ULEMAVU

Posted on: January 6th, 2026

Mkuu wa Wilaya ya Nyang’hwale Mhe. Grace Kingalame amekabidhi mfano wa hundi ya Tsh. Milioni 300 kwa Vikundi 34 vya Vijana, Wanawake, na Watu wenye ulemavu.

Zoezi hilo limefanyika leo Januari 06, 2026 katika ukumbi wa Shule ya Sekondari Msalala kufuatia hafla ya utoaji wa mikopo ya asilimia kumi inayotokana na mapato ya ndani ya Halmashauri ya Wilaya ya Nyang’hwale.

Mkuu wa Wilaya ya Nyang'hwale, Mhe. Grace Kingalame akizungumza na Vikundi vilivyopata Mkopo

Akikabidhi mfano wa hundi hiyo, Mhe. Kingalame amesema Serikali imeendelea na program mbalimbali za kuwainua Wananchi kiuchumi ikiwa ni Pamoja na kila Halmashauri kutenga asilimia 10 ya mapato yake ya ndani kwa Vikundi vya Vijana, Wanawake na watu wenye ulemavu.

“Hii leo nafurahi kuona Halmashauri yetu ya Wilaya ya Nyang’hwale imechangia Tsh. Milioni 165 kwenye mfuko wa Vijana, Wanawake na Wenye ulemavu kati ya Tsh. Milioni 396.1 kilichokasimiwa kwa mwaka huu wa fedha 2025/2026” Amesema Mhe. Kingalame

Mkurugenzi Mtendaji wa H/W ya Nyang'hwale, Ndg. Husna Toni akizungumza na Vikundi vilivyopata Mkopo

Mhe. Kingalame amewaelekeza Wataalamu wa Halmashauri kuendelea kuvitembelea vikundi vinavyopata mikopo na kuvijengea uwezo wa kuongeza mnyororo wa thamani kwenye bidhaa wanazozalisha ili kuwe na vikundi bora vinavyotoa huduma ya kijasiriamali kwenye jamii.

Mwenyekiti wa Halmashauri Mhe. John I. John amevitaka vikundi hivyo kutumia fedha za mikopo walizopata kuimarisha shughuli zao za uzalishaji na hatimae kuimarisha uchumi wa mtu mmojammoja.

Vikundi vya Vijana, Wanawake na Wenye ulemavu wakisikiliza maelekezo katika hafla ya utoaji wa mikopo ya asilimia kumi

Mkurugenzi Mtendaji wa Halmashauri, Ndg. Husna Toni amesema vikundi vinatakiwa kuwa na nidhamu na heshima ya fedha walizokopeshwa ikiwa ni pamoja na kuzingatia mipango kazi waliyoiwasilisha kuombea fedha.

Mwenyekiti wa CCM Wilaya Mhe. Adam Mtore amewataka wanakikundi kudhibiti matumizi ya fedha zao kulingana na kipato. Amewasihi kuwa, matumizi yao yasizidi mapato ili wasikwame kwenye kufanya marejesho ya mkopo.

Kikundi cha watu wenye ulemavu kikipokea mfano wa hundi kwenye hafla ya utoaji wa mikopo

Kwa niaba ya Vikundi vilivyopata mikopo kwa robo ya pili mwaka wa fedha 2025/2026 wamemshukuru Mhe. Dkt. Samia Suluhu Hassan kwa kuwapatia fursa ya kupata mikopo ya asilimia kumi kwa Vijana, Wanawake na Watu wenye ulemavu.