MKURUGENZI AFANYA KIKAO NA WASIMAMIZI WA MIRADI WA IDARA YA MIPANGO,UJENZI NA UNUNUZI

Posted on: December 13th, 2025

Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni, Jana Disemba 12, 2025 amefanya kikao na Wasimamizi wa Miradi kutoka Idara ya Mipango, Ujenzi na Manunuzi kilichofanyika katika ukumbi wa Mikutano wa Halmashauri.

Akiwa katika kikao hiko amewataka Wasimamizi wa Miradi kuzingatia kikamilifu masharti ya mikataba pamoja na mpango kazi wa utekelezaji wa miradi.

Ameeleza kuwa kuzingatia masharti ya mikataba na ratiba za kazi ni msingi muhimu katika kuhakikisha miradi inatekelezwa kwa ubora, kwa wakati na kwa kuzingatia thamani ya fedha.

Aidha, Mkurugenzi Mtendaji amewataka Wahandisi kushirikiana kwa karibu na wadau mbalimbali katika utekelezaji wa miradi, kuanzia hatua ya uandaaji wa makisio ya gharama za mradi yaani (BOQ) hadi kukamilika kwake.

Kwa upande wake, Mhandisi wa Ujenzi Wilaya, Ndg. Gerson Mshana, ameshauri kuwepo kwa kanzi data ya mafundi waliotekeleza miradi kwa ufanisi katika awamu zilizopita ili waweze kuendelea kutumika katika miradi mipya inayotarajiwa kutekelezwa.

Afisa Ugavi na Manunuzi Wilaya, Ndg. Deonatus Mtani, ameshauri kuboreshwa kwa masharti na vigezo vya kuwapata wazabuni, hususan wale wanaoweza kusambaza malighafi kwa wakati, ili kuepuka ucheleweshaji wa utekelezaji wa miradi.