WAZAZI WAHASWA KULEA WATOTO KWA MAADILI ILI KUPUNGUZA WATOTO WA MITAANI

Posted on: December 12th, 2025

Katibu Tawala Wilaya ya Nyang'hwale Ndg. Kaunga Amani amewataka Wazazi na Walezi kulea Watoto kwa kuzingatia maadili mazuri ili kupunguza wimbi la Watoto wa Mitaani.

Amesema hayo jana Disemba 11, 2025 katika kikao cha tathmini ya siku 16 za mapambano dhidi ya Ukatili wa Kijinsia kilichofanyika katika ukumbi wa Kituo cha Uwezeshaji Wananchi Kiuchumi.

Aidha, amewataka Wananchi kushiriki katika shughuli za kiuchumi ili kuepuka. Ukatili wa Kijinsia katika ngazi ya Familia kwa kuwa watakuwa wanasaidiana majukumu ya kulea Familia.

Vilevile, Diwani wa Kata ya Kharumwa Ndg. Leonard Mgema amewataka Wanaume kutoa taarifa kwa mamlaka husika pindi wanapofanyiwa Vitendo vya Kikatili.

Afisa maendeleo ya Jamii Ndg. Julieth Mfinanga amesema vitendo vya Ukatili vinaendelea kupungua ambapo kwa mwaka 2024/2025 kesi za ukatili kwa Watu Wazima zilikua 476 na kesi 80 kwa Watoto, wakati Mwaka 2023/2024 kesi za Watu Wazima zilikuwa 695 na Watoto 514.

Amesema Idara imetoa elimu kwa jamii dhidi ya Vitendo vya ukatili wa Kijinsia na madhara yake kupitia hadhara mbalimbali ikiwemo Makongamano ya Vijana, Vikao vya Wazazi shuleni na Vituo vya kutolea huduma za Afya.

Pia, amesema Idara kwa kushirikiana na Dawati la Ustawi wa Jamii wamefanikiwa kuanzisha Madawati na Mabaraza ya ulinzi na usalama wa Wanafunzi katika Shule zote za Msingi na Sekondari.

Ameongeza kuwa imeundwa Kamati ya kuhudumia Watu wenye Ulemavu ili kuibua na kutoa taarifa za matukio ya Ukatili dhidi ya Watu wenye Ulemavu kwa mamlaka husika.

Pamoja na mambo mengine Idara inaendelea kuunganisha makundi yanayoathirika sana na Vitendo vya Ukatili na upatikanaji wa fursa mbalimbali za kiuchumi ikiwemo Mikopo isiyo na riba na yenye riba nafuu ili kuwakwamua kiuchumi.