DC KINGALAME AKAGUA MAANDALIZI YA KUPOKEA WANAFUNZI WANAOANZA MASOMO JANUARI 13, 2026

Posted on: January 7th, 2026

Mkuu wa Wilaya ya Nyang'hwale Mhe. Grace Kingalame leo Januari 06, 2026 amefanya ziara ya kukagua maandalizi ya kupokea Wanafunzi wa Awali, Darasa la kwanza na kidato Cha Kwanza.

Ziara hiyo imelenga kuona utayari wa miondombinu inayotarajiwa kuwapokea Wanafunzi hao pindi shule zitakapofunguliwa.

Shule ya Sekondari Nyugwa inatarajia kupokea Wanafunzi 242, Kharumwa Sekondari Wanafunzi 87, Msalala Sekondari Wanafunzi 350, na Izunya Sekondari Wanafunzi 85.

Mhe. Kingalame amewataka Walimu kuandaa mpango kazi wa kukabiliana na changamoto ya utoro shuleni na kuwapa Wanafunzi motisha ya kupenda masomo.

Aidha, Mhe Kingalame ameelekeza Bodi za Shule kupanga mikakati ya upatikanaji wa chakula shuleni ili Wanafunzi wasipoteze muda mwingi kwenda kula chakula nyumbani.

Pia, Mhe. Kingalame ameelekeza Bweni la Shule ya Sekondari Nyugwa likamilike kwa wakati ili Wanafunzi wanaotarajiwa kujiunga kidato Cha Kwanza shuleni hapo wapate kulitumia ambapo litasaidia wanafunzi kupata muda mwingi wa kujisomea.

Kwa upande mwingine, Diwani wa Kata ya Izunya Mhe. Mashaka Jeki ameipongeza Serikali ya awamu ya sita inayoongozwa na Mhe.Dkt,Samia Suluhu Hassan kwa kuleta fedha nyingi katika miradi ya elimu ili kuhakikisha kila mtoto wa mwananchi wa Nyang'hwale anapata Elimu Bora.