VYAMA VYA MSINGI VYA USHIRIKA VYATAKIWA KUTHIBITI UTOROSHAJI WA ZAO LA DENGU

Posted on: September 11th, 2025

Kamati ya Mfumo wa Stakabadhi ya mazao ghalani imeketi kujadili namna bora ya utekelezaji wa mfumo huo ili kudhibiti utoroshaji wa zao la dengu ambalo linapaswa kuuzwa na kununuliwa kwa kutumia mfumo huo.

Kamati hiyo imeketi leo Septemba 11, 2025 ikiongozwa na Mwenyekiti wake ambae pia ni Mkururugenzi Mtendaji wa Halmashauri ya Wilaya ya Nyang’hwale, Ndg, Husna Toni.

Wajumbe wa kamati hiyo wameazimia kudhibiti mianya ya utoroshwaji wa zao la dengu unaofanywa na baadhi ya Wafanya biashara wasio waaminifu kwa lengo la kumnyonya mkulima na ukwepaji wa tozo za Serikali.

Mwenyekiti wa Kamati hiyo amesema wadau wote wanaohusika kuusimamia mfumo huo wanatakiwa washirikiane ili kuhakikisha mfumo wa Stakabadhi wa mazao ghalani unatumika ipasavyo kumkomboa mkulima.

Mfumo wa Stakabadhi wa mazao ghalani ni mfumo rasmi wa ununuzi wa mazao ambapo mkulima anapata fursa ya kuchagua mnunuzi wa kumuuzia mazao yake kwa bei yenye tija badaa ya kushindanishwa na wanunuzi wengine.

Aidha, Mfumo huu unawataka wakulima kukusanya mazao yao kwa pamoja kwenye ghala la chama cha ushirika (AMCOS) na kuyauza mazao hayo kwa Pamoja kupitia chama hicho.

Mkoa wa Geita Mfumo huu ulizinduliwa Disemba 11, 2023 Wilayani Nyang’hwale na Mkuu wa Mkoa wa Geita, Mhe, Martine Shigela, ambapo utekelezaji wake umenza kwa zao la dengu.