UTEKELEZAJI WA UJENZI WA MIUNDOMBINU INAYOSIMAMIWA NA TASAF WAZINDULIWA NYANG’HWALE

Posted on: February 21st, 2024

Mkuu wa Wilaya ya Nyang’hwale, Mhe. Grace Kingalame, Jana Februari 20, 2024, amezindua rasmi utekelezaji wa miradi ya maendeleo inayotekelezwa na Mfuko wa Maendeleo ya Jamii (TASAF) kwa mwaka wa fedha 2023/2024.

Uzinduzi wa utekelezaji wa miradi hiyo umefanyika baada ya Halmashauri ya Wilaya ya Nyang’hwale kupokea fedha kutoka Serikali Kuu Tsh. Milioni 840 kwa ajili ya ujenzi wa miundombinu mbalimbali katika sekta za Elimu na Afya.

Akiwa katika hafla ya uzinduzi huo uliofanyika Katika Kijiji cha Lyulu, ameelekeza Wananchi kuilinda miradi hiyo na kutekeleza waliyokubaliana kwenye vikao vyao. Ambapo katika Kijiji hiko ujenzi wa mradi wa Nyumba ya mtumishi katika Shule ya Msingi Ipalang’ombe wenye thamani ya Tsh. Milioni 92.4 unaendelea

“Ndugu zangu Wananchi, nguvu za Wananchi ni makubaliano ya vikao halali ambavyo mmekaa nyinyi wenyewe, basi mtekeleze yale mliokubaliana kwa sababu mradi huu ni wa kwenu nyinyi Wananchi, kwa hiyo muulinde na muuonee wivu” Amesema Mhe. Kingalame

Aidha, Mhe. Kingalame alielekea Kijiji cha Bukwimba ambapo ujenzi wa Bweni la Wanafunzi Wasichana katika Shule ya Sekondari Bukwimba unaendelea. Ujenzi huo utakapokamilika utagharimu Tsh. Milioni 156.7 na bweni hilo litaweza kuchukua Wanafuzi 80.

Akiwa Katika mradi huo ameelekeza kuwa, ujenzi wa bweni hilo ni lazima uzingatie thamani ya fedha, muda wa kukamilisha mradi na uadilifu mkubwa. Amesema kuwa mambo hayo matatu ni lazima yapewe kipaumbele ili mradi uweze kuisha salama na hatimae uanze kutumika.

“Leo naomba mnaohusika na kusimamia mradi huu, kuweni waadilifu kuanzia Mkuu wa Shule na wengine wote. Nikirudu nikikuta mambo yanakwenda ndivyo sivyo sitaomba kwa sababu nitakua nimeguswa mboni ya jicho” Amesema Mhe. Kingalame

“Mhe. Rais amenituma Nyang’hwale kuja kushughulika na matatizo ya Wananchi, Changamoto za Wananchi na pia kusimamia shughuli zote za serikali katika Wilaya hii. Sasa yeyote atakayekuwa anaturudisha nyuma katika juhudi hizo, huyo mtu sitamchekea na hawezi kuwa rafiki yangu” Alisisitiza Mhe. Kingalame

Mhe. Kingalame amemshukuru sana Mhe. Rais wa Jamhuri ya Muungano wa Tanzania, Dkt. Samia Suluhu Hassan kwa kuendelea kutenga fedha nyingi za kutekeleza miradi ya maendeleo katika Sekta mbalimbali Wilayani Nyang’hwale.