“TUNAJIVUNIA KWA MAFANIKIO MAKUBWA NDANI YA MWAKA MMOJA” DED - NYANG’HWALE

Posted on: August 22nd, 2024

Halmashauri ya Wilaya ya Nyang’hwale imepongezwa kwa hatua kubwa ya maendeleo ya sekta mbalimbali kwa kipindi cha mwaka mmoja. Hayo yamesemwa leo Agosti 22, 2024 kwenye Mkutano wa mwaka wa Baraza la Madiwani uliofanyika kwenye ukumbi wa Halmashauri.

Akiwasilisha taarifa ya utekelezaji wa shughuli mbalimbali zilizofanyika kwa mwaka wa fedha 2023/2024, Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni, amesema Halmashauri ilikasimia kukusanya  Tsh. Bilioni 3.2 za mapato ya ndani na imefanikiwa kukusanya Tsh. Bilioni 3.6 sawa na asilimia 112.5 ya malengo.

Amesema kwa mwaka wa fedha 2023/2024 Halmashauri imepokea Tsh. Bilioni 7.03 kutoka vyanzo mbalimbali zilizowezesha ujenzi wa miundombinu mbalimbali ya kutolea huduma ikiwemo Afya, Elimu, Utawala na Kilimo.

“Halmashauri ilipokea Tsh. Bilioni 2.1 kutoka Serikali Kuu kwa ajili ya ukamilishaji wa Jengo la utawala la Halmashauri, Ununuzi wa vifaa tiba katika hospitali ya Wilaya, vituo vya Afya na Zahanati” Amesema Ndg. Husna Toni

Fedha hizo pia zimetumika kukarabati Shule kongwe za Msingi za Mimbili na Nyang’hwale, kuchochea Mfuko wa jimbo, ukamilishaji wa Zahanati mbili katika Vijiji vya Kaboha na Isonda, ukamilishaji wa maabara Shule ya Sekondari Kaboha na Ujenzi wa bweni kwenye Shule ya Msingi Bupamba yenye watoto wenye mahitaji maalum.

Aidha, Kupitia Mfuko wa Maendeleo ya Jamii (TASAF), Halmashauri ilipokea Tsh. Bilioni 1.2 kwa ajili ya ujenzi wa Nyumba tano za Watumishi katika Shule ya Msingi Ipalang’ombe, Ngelela, Nyamikonze, Shule ya Sekondari Nyabulanda, Kituo cha Afya Kafita, ujenzi wa jengo la OPD Kituo cha Afya Nyang’hwale na jengo la Wazazi  Zahanati ya Mwamakiliga.

Vilevile kupitia program ya BOOST, Halmashuri imepokea Tsh. Milioni 293.8 kwa ajili ya ujenzi wa madarasa na matundu ya vyoo katika Shule za Msingi Madulu, Kharumwa na Nyakaswi.

Halmashauri kupitia program ya SEQUIP imepokea Tsh. Bilioni 1.5 kwa ajilii ya ujenzi wa Shule mpya Kata ya Kharumwa, Ujenzi wa mabweni 6 na matundu ya vyoo 28 kwenye Shule za Sekondari Busolwa, Bukwimba, Kanegele na ujenzi wa nyumba ya Mtumishi Shule ya Sekondari Kanegele.

Mkurugenzi Mtendaji amemshukuru Mhe. Rais, Dkt. Samia Suluhu Hassan kwa kutenga fedha nyingi kwa ajili ya kutekeleza miradi ya maendeleo inayoboresha mazingira ya kutolea huduma kwa Wananchi katika sekta mbalimbali ikiwemo Elimu na Afya.