RAS GEITA AIPONGEZA H/W YA NYANG'HWALE KWA KUPANDA UFAULU KWA 15% MTIHANI WA DARASA LA SABA

Posted on: December 4th, 2025

Katibu Tawala wa Mkoa wa Geita, Ndg. Mohamed Gombati leo Disemba 04, 2025 ameipongeza Halmashauri ya Wilaya ya Nyang’hwale kwa kupanda ufaulu kwa asilimia 15% katika matokeo ya mtihani wa Darasa la Saba, hatua ambayo imechangiwa na juhudi za pamoja kati ya Walimu, Wazazi, Walezi na uongozi wa Halmashauri hiyo.

Akizungumza katika hafla ya kuwapongeza Wanafunzi na Walimu iliyofanyika kwenye ukumbi wa Shule ya Sekondari Msalala, Ndg. Gombati amesema kupanda kwa ufaulu huo ni ishara kwamba Wilaya ya Nyang’hwale inaendelea kufanya vizuri kwenye sekta ya elimu na inapaswa kuendeleza kasi hiyo ili kushika nafasi za juu kimkoa na kitaifa.

Aidha, amewataka Walimu kuendelea kufundisha kwa bidii na ubunifu ili kuhakikisha kiwango cha ufaulu kinaongezeka zaidi na amewahimiza Wazazi na Walezi kushirikiana kwa karibu na Walimu kwa kuwajengea nidhamu, maadili mema na usimamizi mzuri kwa watoto wao ili wawe na mazingira rafiki ya kujifunza.

Kwa upande wake, Mwakilishi wa Afisa Elimu Mkoa, Ndg. Salome Cherehani amewataka Walimu kuimarisha ubunifu katika maandalizi na ufundishaji wa masomo, huku akisisitiza umuhimu wa huduma ya chakula shuleni kama motisha inayoongeza umakini na bidii kwa Wanafunzi katika masomo.

"Wazazi wote ambao Watoto wenu wapo shuleni, mnatakiwa kuchangia chakula cha mchana na uji ili kuwafanya Wanafunzi wawe na ari ya kusoma na kufaulu vizuri ili mwakani tukusanyike tena kupongezana, amesema Ndg. Cherehani.

Halikadhalika, Katibu Tawala Wilaya ya Nyang’hwale, Ndg. Kaunga Amani amewataka Walimu kuongeza ushirikiano, kubadilishana uzoefu na mbinu bora za ufundishaji ili kuongeza ufanisi darasani.

Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni ametoa wito kwa Wazazi na Walezi kufuatilia kwa karibu mienendo ya watoto wanapokuwa nyumbani ili kubaini mapema tabia zisizofaa zinazopelekea kushuka kwa ufaulu.

Hafla hiyo imehudhuriwa na Walimu, Wanafunzi Wadau pamoja na viongozi mbalimbali wa Elimu ambapo Walimu na Wanafunzi waliopata ufaulu wa juu walipewa pongezi na zawadi kwa jitihada zao.