Plan Internatinal yainoa Kamati ya Kutokomeza Ukatili wa kijinsia Nyang’hwale

Posted on: February 28th, 2019

Shirika lisilo la Kiserikali la Plan International leo Alhamisi limeanza kutoa Mafunzo ya siku tatu yanayolenga kuwajengea uwezo wa Kutokomeza ukatili dhidi ya  Wanawake na Watoto kwa Kamati ya Wilaya hiyo yenye jukumu la Kutokomeza Ukatili dhidi ya wanawake na Watoto.

Akifungua Mafunzo hayo Mwenyekiti wa Kamati ya Kutokomeza Ukatili dhidi ya Wanawake na Watoto ambaye pia ni Mkurugenzi wa Halmashauri ya Wilaya ya Nyang’hwale Bi. Mariam Chaurembo amewataka Wajumbe kusikiliza kwa makini Mafunzo hayo ili baada ya siku tatu hizo kila Mjumbe awe Mjumbe kwenye eneo lake kuhakikisha Ukatili dhidi ya Watoto na Wanawake Wilayani hapa unakomeshwa.

Bi Chaurembo  amewashukuru sana Shirika hilo kwa kuleta Mafunzo hayo Wilayani humo na amekiri tatizo la Ukatili wa Watoto na Wanawake lipo ambapo alitolea mfano Mwanafunzi wa Kidato cha pili shule ya sekondari Msalala aliyenyanyapaliwa baada ya kufariki wazazi wake kwa kuambiwa naye atakufa hivyo aliyeacha shule na kwenda kujiuza Maeneo ya Mgodini Kakola Wilayani Kahama ambaye alimbaini mwenyewe na akamrudisha shule.

Aidha, Mwenyekiti huyo alitaka kamati hiyo kuhakikisha inaleta matokeo chanya kwenye Jamii kwa kuhakikisha inawasaidia wananchi kujua ni matendo gani yana athari kwa makuzi, elimu, Uchumi na ustawi kwa ujumla kwa mtoto wa kike na mwanamke endapo atafanyiwa maana lipo tatizo la Jamii kufanya mambo pasipo kujua kuwa wanamnyima haki mtoto au mwanamke kutokana na matendo mengine kuwa ni ya kawaida kwenye Jamii husika.

Wakati akitoa mada ya Mpango kazi wa Kitaifa wa kutokomeza Ukatili dhidi ya Wanawake na Watoto wa mwaka 2016 hadi 2022,Mwezeshaji Ndugu Onesmo Itozya aliyataja maeneo nane ya Msingi ya kuzingatia ili kuhakikisha Ukatili dhidi ya Wanawake na Watoto unatokomezwa kuwa ni pamoja na dhana nzima ya jinsia, uwezeshaji Wanawake kiuchumi na kuzifahamu mila na desturi za Jamii inayotuzunguka.

Vilevile, alitaja kuwa lazima tufahamu maeneo salama ya Mazingira ya umma, malezi, msaada na Uhusiano. Huduma kwa wahanga wa vitendo vya ukatili pia  alielezea kuwa ni muhimu kufahamu pamoja na Ulinzi na stadi za Maisha kwa Watoto Mashuleni.

Ndugu Itozya alimalizia maeneo hayo muhimu kwa kusema kuwa ni lazima mwanakamati ya wilaya afahamu taratibu za kuchukua endapo kuna muathirika wa ukatili dhidi ya Wanawake na Watoto lakini pia kufanya tathimini na Ufuatiliaji ili kuweza kumsaidia muhanga watatizo.