NYANG'HWALE YAPONGEZWA KWA KUPATA HATI SAFI

Posted on: June 11th, 2025

Halmashauri ya Wilaya ya Nyang'hwale imepongezwa kwa kupata hati safi kwa kipindi cha miaka mitano mfululizo kuanzia mwaka wa fedha 2019/2020 hadi mwaka wa fedha 2023/2024.

Mkuu wa Mkoa wa Kagera, Mhe. Fatuma Mwasa (Kulia) akiwa na Mkuu wa Wilaya ya Nyang'hwale, Mhe. Grace Kingalame kwenye Mkutano maalumu wa Baraza wa kujadili hoja za Mkaguzi na Mdhibiti Mkuu wa Hesabu za Serikali (CAG)

Pongezi hizo zimetolewa leo Juni 11, 2025 na Mkuu wa Mkoa wa Kagera, Mhe. Fatuma Mwasa kwa niaba ya Mkuu wa Mkoa wa Geita Mhe, Martine Shigela kwenye Mkutano maalumu wa Baraza wa kujadili majibu ya hoja na mapendekezo ya Mdhibiti na Mkaguzi Mkuu wa hesabu za Serikali kwa mwaka wa fedha 2023/2024.

Mhe. Fatuma amewataka Watumishi kuendelea kutekeleza majukumu yao kwa ufanisi kwa kuzingatia Sheria, kanuni na taratibu za Utumishi wa Umma ili kuepuka kuzalisha hoja ambazo zinaweza kuichafua Halmashauri.

Mwenyekiti wa Halmashauri, Mhe. John I. Johan akisema neno kwenye Mkutano maalumu wa Baraza wa kujadili hoja za Mkaguzi na Mdhibiti Mkuu wa Hesabu za Serikali (CAG)

Aidha, Mhe. Fatuma ameipongeza Halmashauri kwa kuendelea kusimamia vizuri ukusanyaji wa mapato ya ndani pamoja na utekelezaji wa miradi ya maendeleo. 

Ripoti ya ukaguzi imeambatanishwa na hoja 23 kwa mwaka wa fedha 2023/2024 pamoja na maagizo mapya manne ya Kamati ya kudumu ya Bunge ya Hesabu za Serikali za Mitaa (LAAC) ya mwaka wa fedha 2022/2023.

Pamoja na mambo mengine, ripoti ya Mdhibiti na Mkaguzi Mkuu wa Hesabu za Serikali ya mwaka wa fedha 2023/2024 imeonyesha kuwa Halmashauri ya Wilaya ya Nyang’hwale imepata Hati Safi.

Mkurugenzi Mtendaji, Bi. Husna Toni akizungumza na wajumbe waliohudhuria Mkutano maalumu wa Baraza wa kujadili hoja za Mkaguzi na Mdhibiti Mkuu wa Hesabu za Serikali (CAG)