NYANG’HWALE YAENDELEA KUNUFAIKA NA FEDHA ZA MIRADI YA MAENDELEO

Posted on: August 21st, 2024

Halmashauri ya Wilaya ya Nyang’hwale imeendelea kunufaika na fedha za miradi ya maendeleo zinazotolewa na Serikali ya awamu ya Sita inayoongozwa na Mhe. Dkt. Samia Suluhu Hassan.

Hayo yameelezwa leo Agosti 21, 2024  katika Mkutano wa baraza la Madiwani robo ya nne kwa mwaka wa fedha 2023/2024 uliofanyika kwa siku ya pili, kwenye ukumbi wa mikutano wa Halmashauri.

Mwenyekiti wa Halmashauri, Mhe, John I. John akiwasilisha taarifa yake  amesema kuwa kwa kipindi cha robo ya nne Halmashauri imepokea kiasi cha TZS Bilioni 2.4 kutoka Serikali kuu kwa aijili ya utekelezaji wa miradi mbalimbali ya maendeleo.

Katika fedha hizo Tsh. Bilioni 1.7 ni kwa ajili ya utekelezaji wa miradi ya BOOST na SEQIUP ambapo Tsh. Milioni 888.8 itatumika kwenye ujenzi wa miundombinu ya Sekondari kidato cha tano na kidato cha sita katika Shule za Sekondari Bukwimba, Busolwa na Kanegele.

“Tumepokea Tsh. Milioni 204.2 ni kwa ajili ya ujenzi wa madarasa katika Shule ya Msingi Nyakaswi na Maduhu. Aidha, Tsh. Milioni  100 kwa ajili ya ujenzi wa nyumba ya Walimu (2 in1) katika Shule ya Sekondari Kanegele” Amefafanua Mhe. John.

Mhe. John amesema kuwa Tsh. Milioni 584.2 zimepokelewa kwa ajili ya ujenzi wa Shule mpya ya Sekondari Kata ya Kharumwa.

Aidha, Halmashauri imepokea kiasi cha Tsh. Milioni 328.6 kwa ajili ya ukamilishaji wa madarasa pamoja na matundu ya vyoo kwa Shule ya Sekondari Bukwimba, Busolwa na Shule ya Msingi Kharumwa.

Vilevile Halmashauri imepokea kiasi ch Tsh. Milioni 340.9 kwa ajili ya mradi wa kuondoa umaskini kupitia Mfuko wa Maendeleo ya Jamii (TASAF).

Kaimu Mkurugenzi wa Halmshauri ya Wilaya ya Nyang’hwale, Ndg. Majagi Maiga amesema kuwa Halmashauri ilikasimia kukusanya Tsh. Bilioni 3.2 za mapato ya ndani, hadi kufikia Juni 2023/2024 Hlmashauri imefanikiwa kukusanya Tsh. Bilioni 3.6 sawa na asilimia 112.5 ya malengo.

Mwenyekiti wa Halmashauri amemshukuru Mhe. Rais, Dkt. Samia Suluhu Hassan kwa kutenga fedha nyingi kwa ajili ya kutekeleza miradi ya maendeleo inayoboresha mazingira ya kutolea huduma kwa Wananchi katika sekta mbalimbali ikiwemo Elimu na Afya.