Nyang'hwale kuwa Malaria 'Free Zone'

Posted on: October 30th, 2018

Mkuu wa Wilaya ya Nyang’hwale Mhe. Hamim Gwiyama amewataka wasimamizi wa zoezi la Upuliziaji wa Kiutilifu majumbani kwa ajili ya kuua Mbu waenezao Malaria kuhakikisha wanafuata maelekezo waliyopewa ili kutoa huduma kusudiwa na kutokomeza malaria wilayani hapa.

Ameyasema hayo leo jumatano katika kijiji cha mimbili alivyokuwa akizindua siku mwezi mmoja wa upuliziaji wa dawa ya ukoko majumbani inayoua mazalia na mbu wa Maralia.

Awali wakati akikagua kambi ya wapuliziaji iliyopo Kharumwa aliwataka wahusika wote wa upuliziaji kuhakikisha nyumba zote wanapulizia kwani tamaduni na imani potofu zilizopo kwenye jamiii wanazijua na wakahakikishe wanawaelewesha vizuri wananchi na ndio dhumuni la wao kutoka kwenye vijijji husika na kuingia kwenye zoezi hili.

Alipokuwa akizungumza na wadau kutoka ABT Associate aliwashukuru USAID kwa kufadhili Mradi huo ambao utapunguza maambukizi mapya ya wagonjwa wa Maralia kwani hadi kufikia Januari – Juni, 2017/2018 tulionekana kuwa na maambukizi kwa kiwango cha 14% ambapo kimeshuka kutoka 18% ya Mwaka 2016/2017, na miaka hii miwili zoezi la upuliziaji lilifanyika ambapo kabla yake Maralia ilikuwa juu kwa 51% Wilayani hapa.

Mhe. Gwiyama aliwataka wahusika wote kuhakikisha wanatoa elimu ya kutosha kwa jamii ili Nyang’hwale iwe Maralia free zone.

Vile vile, Mhe. Mkuu wa Wilaya ameitaka jamii kuondoa Mifugo ndani wanamolala Binadamu kama vile kuku na  bata, ili kupisha zoezi na baada ya saa mbili wafungue milango na kufanya usafi na wadudu watakaowakuta wamekufa wakawachimbie kwenye shimo. Na baada ya nusu saa waingize ndani vifaa vyao na  kuendelea na shughuli zao za kila siku.

Sheria namba tano ya Afya ya jamii ya mwaka 2009 Kifungu kidogo cha kwanza na pili havikusahaulika pale aliposisitiza ya kuwa yeyote atakayekaidi zoezi hilo atachukuliwa hatua za kisheria na kulipa faini au kwenda Jela hadi miezi sita.

Awali Mkurugenzi Mtendaji wa Halmashauri ya Wilaya ya Nyang’hwale Bi. Mariam Chaurembo alimweleza Mkuu wa Wilaya kuwa anayo furaha kutekeleza zoezi la upuliziaji wa kiuatilifu cha kuua Mbu waenezao Maralia kwani itawanufaisha sana hasa kina mama na watoto wa Wilaya ya Nyang’hwale.

Afisa kutoka ABT Associate Ndg. Joshua alitambulisha Mradi huo ambapo alisema kwa Mkoa wa Geita unatekelezwa katika Wilaya za Chato na Nyang’hwale, na aliiomba Serikali kupitia Maafisa Tarafa, Watendaji wa Kata,  Vjiji pamoja na Wenyeviti wa vijiji na Vitongoji kushirikia kuelimisha Jamii ili kaya nyingi ziweze kufikiwa na kutoka kwenye 14% ya maambukizi hadi 0%.