Nyamikonze kupata Kituo cha Afya Julai

Posted on: April 27th, 2018

Mkurugenzi Mtendaji wa Halmashauri ya Nyang’hwale Ndugu Carlos Gwamagobe amewataka wananchi wa Kijiji cha Nyamikomze kumuunga Mkono Mhe. Mbunge kwenye Ujenzi wa Kituo cha Afya Nyamikonze ili Mwezi Julai kianze kutoa huduma kwa wananchi kwani hadi sasa imebaki miundombinu ya Choo, Kichomea Taka na Nyumba ya Watumishi ili kituo cha Afya Nyamikonze kianze kutoa Huduma. “Serikali imeamua Mwezi wa saba kuanza kutoa huduma za afya hapa” alieleza Mkurugenzi.

Ameeleza hayo wakati wa Maadhimisho ya Siku ya Muungano yaliyoambatana na Mkutano uliofanyika ndani ya Majengo ya Kituo hicho ambapo Menejimenti ya Halmashauri ilipowatembelea na kuzungumza na viongozi na wadau wa maendeleo kwenye kata hiyo.

Ndugu Gwamagobe amesisitiza umuhimu wa kituo hicho kwani wakazi wa maeneo hayo watapata huduma karibu tofauti na ilivyo hivi sasa.

Amewataka viongozi wote kwenye kata hiyo kuunganisha wananchi kwenye suala hilo ili wahamasike na kuweza kujitolewa kwa moyo na kuhakikisha wanapata ari ya kupata huduma ya afya kwa karibu.

Wakati akimkaribisha Mkurugenzi Mtendaji, Mhe. Diwani wa kata ya Mwingiro ndugu Shilole alimpongeza Mkurugenzi Mtendaji kwa kuwajali kwani pamoja na kwenda kuhamasisha numaliziaji wa Ujenzi huo pia amewaahidi kuwapatia gari la kubebea Wagonjwa mara tu kituo cha Afya kitapoanza kazi.

Aidha Mhe. Diwani alimuahidi Mkurugenzi kuwaunganisha wananchi na Viongozi wa kata hiyo kuhakikisha wanajitoa kwenye mapambano hayo.

Kata ya Mwingiro ina vijiji vine vya Mwingiro, Iyenze, Mwasabuka na Nyamikonze ambapo wananchi wa kata hiyo wanahudumiwa kwenye Zahanati ya Nyashilanga iliyo mbali na makazi yao.

Kata ya Mwingiro ipo kaskazini mwa Wilaya ya Nyanghwale na inapatikana KM 35 kutoka Makao makuu ya Wilaya ambapo wananchi wake wanajihusisha na shughuli za Kilimo, Ufugaji na Uchimbaji wa Madini ya Dhahabu.

Mkutano huo uliambatana na Harambee ya Ujenzi ambapo jumla ya Fedha taslimu zaidi ya laki mbili zilitolewa na mifuko ya Saruji 118, Mbao 10 na Misumari kg 32 iliahidiwa kutolewa ndani ya wiki moja.