MRADI WA STENDI MPYA YA MABASI IKANGALA WAFUNGULIWA

Posted on: August 30th, 2025

Mkuu wa Wilaya ya Nyang’hwale, Mhe. Grace Kingalame, amefungua matumizi ya Mradi wa Stendi Mpya ya Mabasi Ikangala unatekelezwa na Halmashauri kwa kushirikiana na Kampuni ya Uchimbaji Madini, Barrick Bulyanhulu kupitia fedha za Wajibu wa Kampuni kwa Jamii (CSR).

Hafla ya ufunguzi huo imefanyika leo Agosti 30, 2025 katika Kijiji Cha Ikangala ambapo Wananchi, Viongozi wa dini, na Wadau wa usafirishaji wamepata fursa ya kushiriki tukio hillo.

Mhe, Kingalame amesema ufunguzi wa stendi hiyo ni matunda ya Serikali ya awamu ya Sita inayoongozwa na Mhe, Dkt, Samia Suluhu Hassan kwa kuweka mazingira rafiki kwa wawekezaji na Wafanya biashara Nchini.

“Natoa rai kwa Wananchi na wadau wote wa usafirishaji waweze kutumia fursa ya uwepo wa stendi hii kujikwamua kichumi kupitia biashara mbalimbali zinazotokana na mahitaji ya utoaji wa huduma kwa Wasafiri" Ameeleza.

Meneja wa Mradi, Mhandisi Bruno Marco amesema ujenzi wa stendi ya mabasi Ikangala unatekelezwa kwa awamu kwa kutumia Mfumo wa Mkandarasi kwa baadhi ya kazi na wataalamu wa ndani (Force Akaunti),  na hadi sasa mradi umefikia asilimia 85.

“Ujenzi wa Stendi ya Ikangala unajumuisha miundombinu mbalimbali ikiwemo Choo cha Stendi, Eneo la kupaki Mgari ya abiria, jengo la abiria, jengo la huduma ya Chakula, Jengo la mkusanya mapato, kizimba cha kuhifadhia taka, fremu za maduka, jengo la polisi, na Mgahawa” Amefafanua.

Aidha, Juma Manyama, Mwananchi wa Kijiji cha Ikangala amesema amefurahishwa kufunguliwa na kuanza kutumika kwa Stendi ya Mabasi Ikangala kwa kuwa kuanza kwa stendi hiyo kutapandisha thamani ya ardhi katika Kijiji hicho.