MRADI WA INTER HOUSE COMPETITION WAWAVUTIA WANAFUNZI KUKAA BWENI

Posted on: October 8th, 2025

Mradi wa Interhouse Competition umekua kivutio kwa Wanafunzi wa Shule ya Sekondari Mwingiro kutumia huduma ya kukaa bweni badala ya kwenda Shule wakitokea nyumbani.

Mradi huo umebuniwa na H/W Nyang’hwale kupitia Idara ya Maendeleo ya Jamii ili kuondoa changamoto ya utoro, ufaulu hafifu na idadi ndogo ya Wanafunzi wanaokaa bweni.

Afisa Maendeleo ya Jamii, Ndg. Dalius Nyanda amesema kupitia mradi huo Wanafunzi 367 wa Shule ya Sekondari Mwingiro wamewezeshwa na kujengewa uwezo wa kujitambua na kujitegemea kupitia Shughuli za michezo, burudani na Shughuli za uzalishaji mali zinazosimamiwa na Wanafunzi.

Amesema jumla ya miradi minne ya uzalishaji mali imeanzishwa kupitia Wanafunzi ambayo ni mradi wa kilimo cha Bustani, mradi wa ufugaji wa nyuki, mradi wa utengenezaji wa unga lishe na mradi wa utengenezaji wa sabuni za maji.

“Kupitia mradi huu Jumla ya Wazazi wa Wanafunzi 32 wamekubali kuleta Watoto wao kukaa bweni huku jitihada za kuwafikia wazazi waliobaki zikiwa zinaendelea” Ameeleza.

Mkuu wa Wilaya ya Nyang’hwale, Mhe. Grace Kingalame amewataka Wazazi kutumia fursa ya uwepo wa mazingira bora ya kutolea elimu yaliyoboreshwa na Serikali ya awamu ya sita ikiwemo ujenzi wa mabweni Shuleni hapo.

Mkurugenzi Mtendaji wa H/W Nyang’hwale Ndg. Husna Toni amewaeleza Wazazi kuwa elimu ndio urithi pekee ulio bora kwa Mtoto ambao utamsaidia kuendesha maisha yake ya baadae.

Aidha, amewasihi Wanafunzi kuwa hakuna biashara nyengine yoyote inayolipa zaidi ya kusoma, hivyo wawekeze muda wao, akili zao na juhudi zao kwenye masomo ili waweze kupata matokeo yenye tija.