MKURUGENZI MKUU TAKUKURU AZINDUA JENGO LA OFISI ZA TAKUKURU NYANG'HWALE

Posted on: October 22nd, 2025

Mkurugenzi Mkuu wa Taasisi ya Kuzuia na Kupambana na Rushwa Tanzania (TAKUKURU) Ndg, Crispin Francis Chalamila  jana Oktoba 21, 2025 amezindua Jengo la Ofisi za TAKUKURU Wilaya ya Nyang'hwale.

Jengo hilo lenye thamani ya Tsh Milioni 386.3  lilianza kujengewa kuanzia Febuari 17, 2025 hadi Agosti 17, 2025 kwa bajeti ya mwaka 2024/25 ya fedha zinazotengwa na TAKUKURU kwa ajili ya kujenga majengo ya ofisi kwenye Wilaya na Mikoa.

(Mkurugenzi Mkuu wa TAKUKURU Ndg Chalamila akikata utepe ishara ya kukabidhi Gari kwa Ofisi ya TAKUKURU Nyang'hwale)

Akizungumza katika hafla hiyo Ndg, Chalamila ameipongeza TAKUKURU Nyang'hwale kwa kusimamia ujenzi wa jengo zuri lenye miundombinu inayompa faragha mwananchi kutoa taarifa pindi anapoona vitendo vya rushwa vinafanyika.

Aidha Ndg, Chalamila amezitaka Taasisi za Serikali zilizopo ndani ya Wilaya ya Nyang'hwale kushirikiana na Maafisa wa TAKUKURU kudhibiti na kutokomeza rushwa ili kuleta Maendeleo kwenye Taasisi na jamii kwa ujumla.

(Wakuu wa vyombo vya Ulinzi na Usalama na Taasisi wakiwa katika uzinduzi wa jengo la TAKUKURU Nyang'hwale)

Pia Ndg, Chalamila ameelekeza Shule zote za Sekondari na Msingi zilizopo ndani ya Wilaya ya Nyang'hwale kuunda klabu za wapinga rushwa ili Wanafunzi hao  wakawe mabalozi wa kupinga rushwa kwenye jamii wanayotoka.

(Maafisa wa TAKUKURU Nyang'hwale wakiwa katika picha ya pamoja na Mkurugenzi Mkuu wa TAKUKURU Ndg, Chalamila)

Kwa upande mwingine Mkuu wa Taasisi ya Kuzuia na Kupambana na Rushwa mkoa wa Geita Ndg, James Ruge ameshauri Taasisi zote za Serikali zinapopokea fedha za miradi zitoe matangazo kwa Wananchi ili wapate kutambua na kusaidia kudhibiti utoroshaji wa rasimali katika miradi hiyo.

(Mkurugenzi Mkuu wa TAKUKURU Ndg, Chalamila akiwa katika picha ya pamoja na viongozi wengine meza kuu wakifatilia matukio katika hafla ya uzinduzi)

Vile vile Mwenyekiti wa Chama Cha Mapinduzi (CCM) Wilaya Ndg Adam Mtore ameipongeza TAKUKURU Nyang'hwale kwa usimamizi mzuri wa miradi ya Maendeleo inayotekelezwa katika Wilaya ya Nyang'hwale.