MITUNGI YA 63 YA GESI YAGAWIWA KWA WATENDAJI WA VIJIJI NA MGANGA MFAWIDHI WA KITUO CHA AFYA KWA AJILI YA KUFUNDISHIA SOMO LA LISHE VIJIJINI

Posted on: August 26th, 2025

Mkurugenzi Mtendaji wa Halmashauri ya Wilaya ya Nyang’hwale Ndg.Husna Toni amekabidhi Mitungi ya Gesi 63 kwa Watendaji wa Vijiji na Mganga Mfawidhi wa Kituo cha Afya Nyang’hwale iliyonunuliwa na Halmashauri kupitia Mapato ya Ndani.

Makabidhiano hayo yamefanyika leo Agosti 26, 2025 katika Ofisi za Mkurugenzi Mtendaji.

Akiwa katika makabidhiano hayo Mkurugenzi Mtendaji amewataka Watendaji wa Vijiji kusimamia afua za Lishe katika maeneo yao ambapo amesema kila Mtendaji wa Kijiji anatakiwa kuhakikisha kila Kaya inafuata ushauri wa lishe uliotolewa na Wataalamu wa Lishe.

Aidha, Mkurugenzi amewataka Wataalamu kutumia nishati safi ya kupikia siku ya Afya na Lishe ya Kijiji wanapotoa elimu ya Lishe kwa Wananchi na kuacha matumizi ya kuni ambayo yanasababisha ukataji wa Miti ili kulinda na kutunza Mazingira.

Vilevile, ametumia fursa hiyo kuwataka Watendaji wa Vijiji kusimamia upatikanaji wa Chakula Shuleni kwa kuzingatia ushauri wa Wataalamu ili kujenga Afya bora na mazingira mazuri ya kujisomea kwa Wanafunzi.

Pamoja na mambo mengine, amewataka Watendaji wa Kijiji kuendelea kutunza Mali za Umma ikiwemo Mashine za kuchanganyia Virutubishi zilizofungwa katika maeneo  mbalimbali ya Vijiji pamoja na kutunza Mitungi ya Gesi waliokabidhiwa leo ili viweze kudumu kwa muda mrefu.