MILIONI 303 ZATOLEWA KWA VIKUNDI 53 VYA VIJANA, WANAWAKE NA WENYE ULEMAVU AWAMU YA PILI

Posted on: June 3rd, 2025

Halmashauri ya Wilaya ya Nyang’hwale leo Juni 03, 2025 imetoa mikopo ya asilimia kumi ya mapato ya ndani kwa Vikundi vya Wanawake, Vijana na Watu wenye Ulemavu kwa awamu ya pili ambapo awamu ya kwanza ilitolewa mnamo  Januari 30, 2025.

Hafla hiyo imefanyika katika ukumbi wa Bwalo la Shule ya Sekondari Msalala ambapo Mwenyekiti wa Kamati ya Uhakiki wa Mikopo, ambaye pia ni Katibu Tawala Wilaya Ndg. Kaunga Amani amekabidhi mfano wa hundi yenye thamani ya Tsh. Milioni 303 kwa jumla ya vikundi 53 vya Vijana, Wanawake na Watu wenye Ulemavu.

Akiwa katika hafla hiyo Ndg. Kaunga amewataka na kuwaelekeza wanufaika wa mikopo hiyo kuhakikisha wanarejesha kwa wakati ili kuwapa fursa wanufaika wengine.

Aidha, amemuelekeza Mkurugenzi Mtendaji kuhakikisha wanufaika wote wanakuwa na Bima ya Afya kabla ya kuanza shughuli za kiuchumi ili kuepuka vikundi hivyo kutumia mikopo hiyo kwenye ugonjwa badala ya kujiendeleza na shughuli za kiuchumi

Vilevile, Mkurugenzi Mtendaji wa Halmashauri ya Wilaya ya Nyang'hwale Ndg. Husna Toni ametoa rai kwa Vikundi kuwa  mabalozi wazuri kwa Wananchi wengine ambao wameacha kujiunga kwenye Vikundi ili waweze kukidhi vigezo vya kukopesheka.

Pamoja na mambo mengine elimu ya ujasiriamali na matumizi sahihi ya mikopo imetolewa kwa Vikundi hivyo ili kuhakikisha wanatumia vizuri fursa ya Mikopo waliyopatiwa ambapo wameshauriwa kuongeza thamani ya bidhaa au huduma watakazoenda kuzitoa kwenye Masoko kwa kuzingatia mnyororo wa thamani.