MASHINDANO YA UMITASHUMTA YAKAMILIKA NGAZI YA WILAYA, NYANG’HWALE

Posted on: May 21st, 2023

Mashindano ya Umoja wa Michezo na Taaluma kwa shule za Msingi Tanzania (UMITASHUMTA) kwa ngazi ya wilaya yamekamilika leo Mei 21, 2023 katika viwanja vya shule ya Msingi Khalumwa iliyopo Tarafa ya Msalala wilaya ya Nyang’hwale.

Mashindano hayo yalianza Aprili 24, 2023 kwa ngazi ya Shule, Kata, na Tarafa. Mnamo tarehe 20 hadi 21 Mei, 2023   Jumla ya tarafa nne ambazo ni Tarafa ya Msalala, Nyijundu, Nyang’hwale, na Bukwimba  zilichuana kwenye michezo mbalimbali ili kupata timu ya Wilaya.

Akiwasilisha taarifa ya mashindano hayo, Kaimu Afisa Michezo, Utamaduni na Sanaa wilaya ya Nyang’hwale, Bw. Fedasto Milonga alisema kuwa “ Katika mashindano ya UMITASHUMTA ngazi ya Wilaya michezo inayoshindaniwa ni pamoja na mpira wa miguu kwa wasichana na wavulana, mpira wa pete, mpira wa mikono kwa wasichana na wavulana, Riadha na Fani za ndani (kwaya, ngoma, na muziki)”

Aidha, alieleza kuwa Michezo hiyo ilikuwa na Jumla ya wanamichezo 224, kati ya hao wavulana ni 105 na wasichana ni 119. Hivyo baada ya mashindano hayo kamati ya maandalizi imefanikiwa kupata jumla ya wanamichezo tisini (90) watakaounda timu ya wilaya katika michezo mbalimbali. Kati ya hao wavulana ni arobaini (40) na wasichana ni hamsini (50).

Akifunga mashindano hayo kwa niaba ya Mkurugenzi wa Halmashauri ya Wilaya ya Nyang’hwale, Afisa Elimu Msingi Wilaya ya Nyang’hwale, Bw. Nassor Hamisi alisisitiza kuwa Michezo huimarisha afya na serikali imeweka juhudi kubwa kuendeleza michezo mashuleni ili kuibua na kuendeleza vipaji vya wanafunzi na tasnia ya michezo kwa ujumla.