MAAFISA KILIMO NA MIFUGO WATAKIWA KUONGEZA UBUNIFU ILI KUWASAIDIA WAKULIMA KUZALISHA KWA TIJA

Posted on: September 18th, 2025

Katibu Tawala Msaidizi Idara ya Uchumi na Uzalishaji Mkoa wa Geita Ndg, Elfas Msenya, jana Septemba 17, 2025, amezungumza na Maafisa Mifugo na Maafisa Ugani wa H/W ya Wilaya ya Nyang'hwale kutathmini hali ya Kilimo, Mifugo na Uvuvi ndani ya Wilaya ya Nyang'hwale.

Katibu Tawala Msaidizi Ndg. Elfas Msenya akizungumza na Maafisa Mifugo na Ugani.

Akizungumza kwenye kikao kilichofanyika kwenye ukumbi wa Mikutano wa Halmashauri Ndg, Msenya amewataka Maafisa Mifugo kuharakisha zoezi la chanjo dhidi ya ugonjwa wa mapafu ya ng’ombe na uvikaji hereni linakamilika kabla msimu wa masika haujaanza.

Aidha, amewaelekeza Maafisa Kilimo kuhakikisha Mbolea na Mbegu za ruzuku zinazotolewa na Wizara ya Kilimo zinawafikia wakulima kwa wakati na kwa bei elekezi.

"Nawaelekeza Maafisa Kilimo muende mkatumie vizuri taaaluma zenu kwenye Uzalishaji wa dhahabu nyeupe ambayo ni zao la pamba ili wakulima wasijutie kulima zao hilo" Amesema Ndg, Elfas Msenya.

Vilevile, Ndg. Msenya ameipongeza Idara ya Kilimo, Mifugo na Uvuvi kwa kupeleka Maafisa wengi kujifunza kwenye maonesho ya Kilimo (Nanenane) yaliyofanyika Mwanza, hatua ambayo itaongeza maarifa na ubunifu kwa Maafisa hao.

Kwa upande wake, Mkuu wa Idara ya Kilimo, Mifugo na Uvuvi wa H/W ya Wilaya ya Nyang'hwale Ndg. David Mabula, ameishukuru timu nzima ya wataalamu kutoka Mkoani kwa maelekezo na ushauri walioutoa na kuahidi kuyafanyia kazi kwa manufaa ya Wananchi.

Maafisa Mifugo na Ugani wakiwa kwenye kikao kazi cha kujadili tathimini ya hali ya Kilimo na Mifugo.