KONGAMANO LA VIJANA TARAFA YA NYIJUNDU

Posted on: November 26th, 2025

Timu ya Wataalamu Kutoka Ofisi ya Mkurugenzi Mtendaji wa Halmashauri ya Wilaya ya Nyang'hwale, Jana Novemba 25, 2025 imefanya Kongamano la Vijana katika ukumbi wa "Rose Garden" Kata ya Busolwa ikiwa ni Muendelezo wa Makongamano ya Vijana katika Wilaya ya Nyang'hwale.

Wataalamu hao wamezungumza na Vijana mambo mbalimbali yanayohusu Vijana ikiwa ni pamoja na fursa za kiuchumi, matumizi sahihi ya fedha, stadi za maisha pamoja na uzalishaji mali.

Pia, Vijana wamefahamishwa kuhusu sera ya Maendeleo ya Vijana toleo la mwaka 2024, pamoja na uundwaji wa Wizara mpya ya Maendeleo ya Vijana kuwa ni juhudi zinazochukuliwa na Serikali katika kutambua kundi hilo kwa umuhimu wake juu ya ustawi wa Taifa endelevu.

Afisa Maendeleo ya Jamii Ndg, Estelina Colman amewasihi Vijana kuchangamkia fursa ya uwepo wa mikopo ya wajasiriamali wadogo ambayo inatolewa na Serikali kupitia benki ya NMB.

Aidha. Afisa Mipango Ndg. Faston Rwegoshora amewataka Vijana kuunda vikundi ambavyo vitaweza kujipatia kipato kupitia uuzaji wa madini ujenzi kama vile mawe, kokoto na mchanga, ambapo madini hayo yanahitajika kwenye miradi inayotekelezwa na Serikali.

Kwa upande mwingine Afisa Maliasili na uhifadhi Mazingira Ndg. Mrema Juma amewashauri Vijana kutumia fursa ya mazao ya misitu kama vile mbao, mazao ya nyuki kama vile asali, nta, na sumu ya nyuki kujikwamua kiuchumi.

Afisa Utamaduni na Michezo Wilaya Ndg, Erasto Joseph amewataka Vijana kuunda vikundi vya sanaa na kuvisajili Baraza la Sanaa na Utamaduni (BASATA) ili kutambulika kisheria na kupata nafasi ya kutumbuiza hata kwenye matukio ya kiserikali.