KAMATI ZA UKIMWI MKOANI GEITA ZATAKIWA KUDHIBITI MAAMBUKIZI MAPYA YA VVU KWENYE JAMII

Posted on: December 1st, 2024

Kwa niaba ya Mkuu wa Mkoa wa Geita, Mkuu wa Wilaya ya Geita Mhe, Hashim Komba ameshiriki katika Maadhimisho ya Siku ya Ukimwi Duniani, ambapo Kimkoa maadhimisho hayo yamefanyika leo Desemba 01, 2024 Wilaya ya Nyang’hwale Kata ya Bukwimba, Kijiji cha Bukwimba.

Maadhimisho hayo yameenda sambamba na shughuli mbalimbali za kijamii ikiwemo upandaji wa miti katika Hospitali ya Wilaya, kupima maambukizi ya Virusi vya UKIMWI, na shughuli nyengine zinazohusiana na maswala ya Afya.

Akiwa kwenye maadhimisho hayo Mhe, Komba amewataka Wakurugenzi wa Halmashauri zote za Mkoa wa Geita kuhakikisha kamati za mapambano dhidi ya Ukimwi zinaendelea kufanya shughuli zake na kutimiza wajibu wake kwa malengo ya kuzuia maambukizi mapya ya VVU.

“Kwa mamlaka za Serikali za Mitaa Wakurugenzi wetu tuhakikishe kamati za Waheshimiwa Madiwani hasa kamati ya mapambano dhidi ya Ukimwi inaendelea kutimiza wajibu wake vizuri, na inayafikia makundi yote muhimu ya watu wanaoishi na Virusi vya Ukimwi” Amesema Mhe, Komba

Aidha, ametoa rai kwa wadau wa maendeleo kuendelea kuyafikia makundi mbalimbali na kutoa elimu ya kutosha kwa Wananchi wote hasa kwenye maeneo ya migodi ili watu waweze kupima virusi vya Ukimwi kwa hiari na kufahamu hali ya afya zao.

Pamoja na mambo mengine, Mhe, Komba amehimiza swala la usambazaji wa zana za kujinga dhidi ya maambikizi ya VVU katika maeneo yote hatarishi ambayo kuna mikusanyiko mikubwa ya watu ili kuepukana na vitendo vya ngono zembe vinavyoweza kuongeza idadi ya maambikizi mapya.

Halikadhalika Mratibu wa Ukimwi Wilaya ya Nyang’hwale Ndg, Getrude Paulin, amesema jamii imeendelea kuongeza kiwango cha uelewa na hivyo tahadhari zinaendelea kuchukuliwa katika maeneo mbalimbali ya Wilaya ikiwemo Wananchi kujitokeza kwa wingi kupima Afya na kupata Ushauri wa Daktari.