JESHI LA AKIBA LATAKIWA KUIMARISHA ULINZI NA USALAMA KIPINDI CHA MBIO ZA MWENGE WA UHURU 2025

Posted on: August 28th, 2025

Mkuu wa Wilaya ya Nyang’hwale, Mhe. Grace Kingalame, leo Agosti 28, 2025, amezungumza na Askari wa Jeshi la Akiba katika Uwanja wa Shule ya Msingi Kharumwa juu ya maandalizi ya mapokezi ya Mwenge wa Uhuru 2025.

Jumla ya Askari 100 wa Jeshi la akiba wameandaliwa kwa ajili ya kushirikiana na vyombo vingine vya Ulinzi na usalama katika kuimarisha ulinzi na usalama kwa kipindi chote cha shamrashamra za mapokezi ya Mbio za Mwenge wa Uhuru.

Mhe. Kingalame amesema ameridhishwa na maandalizi yanayoendelea kufanywa na Jeshi la Akiba chini ya usimamizi wa Mshauri wa Jeshi la Akiba na Jeshi la Polisi kuelekea mapokezi ya Mwenge wa Uhuru 2025.

"Jeshi la Akiba kwa kushirikiana na vyombo vingine vya usalama mna jukumu la kuhakikisha ulinzi na usalama hasa tunapoelekea kwenye zoezi la kuupokea Mwenge wa Uhuru katika Wilaya yetu” Ameeleza Mhe. Kingalame.

Mwenge wa Uhuru 2025 unatarajiwa kuwasili Wilaya ya Nyang'hwale mnamo Septemba 03, 2025, ambapo mapokezi yatafanyika katika Uwanja wa Shule ya Msingi Wavu, Kijiji cha Wavu na Mkesha unatarajiwa kuwa Uwanja wa Sabasaba Kijiji cha Kharumwa.

Aidha, Mbio za mwenge wa Uhuru 2025 zinaambatana na Kauli mbiu isemayo "Jitokeze Kushiriki Uchaguzi Mkuu wa Mwaka 2025 kwa Amani na Utulivu"