HONGERA MKURUGENZI MTENDAJI KWA KUTEKELEZA MIRADI KWA UFANISI – MWENYEKITI KAMATI YA FEDHA UONGOZI NA MIPANGO.

Posted on: August 1st, 2024

Mwenyekiti wa Kamati ya Fedha, Uongozi na Mipango ambae pia ni Diwani wa Kata ya Kafita, Mhe. John I. John amempongeza Mkurugenzi Mtendaji wa Halmashauri ya Wilaya ya Nyang’hwale kwa utekelezaji mzuri wa miradi ya maendeleo.

Pongezi hizo zimetolewa Jana Julai 31, 2024 kufuatia ziara ya Kamati ya Fedha, Uongozi na Mipango ya kukagua miradi ya maendeleo Kata ya Mwingiro, Nyabulanda na Shabaka.

“Tunakupongeza Mkurugenzi Mtendaji kwa ufanisi wako wa usimamiaji wa miradi hii ya maendeleo kwa sababu kila tunapopita tunakuta ujenzi wa miradi unaendelea na mafundi wapo eneo la mradi wanaendelea na kazi” Amesema Mhe. John I. John

Wajumbe wa Kamati hiyo pia wameshauri kasoro ndogondogo zilizobainika kwenye baadhi ya miradi zifanyiwe kazi kwa wakati ili kuwa na miradi yenye ubora.

“Tunamshukuru Mhe. Rais, Dkt. Samia Suluhu Hassan kwa kuendelea kutuletea fedha nyingi za Miradi ya maendeleo hasa kwenye Sekta ya Elimu na Afya, tunaahidi kuzisimamia fedha hizi ipasavyo kwa kushirikana na Mkurugenzi ili zilete tija kwa Wananchi” Ameongeza Mhe. John I. John

Ziara hiyo ilitembelea mradi wa ujenzi wa matundu 14 ya vyoo Shule ya Sekondari Mwingiro, Ujenzi wa Nyumba ya Mtumishi (2 in1) Shule ya Sekondari Nyabulanda, Ujenzi wa Jengo la Wagonjwa wa nje (OPD) Kituo cha Afya Nyang’hwale, Mradi wa ufugaji nyuki Pori la Nyamgogwa na Kikundi cha Wanawake cha UMOJA NYANG’HWALE.

Ziara itaendelea leo Agosti 01, 2024.