HALMASHAURI YASAINI MKATABA NA KAMPUNI ZA URASIMISHAJI WA MAKAZI HOLELA

Posted on: September 18th, 2025

Halmashauri ya Wilaya ya Nyang’hwale leo Septemba 18, 2025 imesaini Mkataba na Kampuni 12 za Urasimishaji wa Makazi holela katika Ofisi ya Mkurugenzi Mtendaji.

Kaimu Mkurugenzi Ndg. Ezekiel Ntiriyo amezitaka Kampuni zilizosaini Mkataba huo kuzingatia masharti na makubaliano yaliyowekwa kwenye mkataba ili kufanya kazi kwa weledi.

Mkuu wa Idara ya Ardhi (W) Ndg, Mathias Bujiku amesema maeneo ambayo yatafikiwa na zoezi hilo ni pamoja na Kata ya Busolwa Kijiji cha Busolwa na Ifugandi, Kata ya Nyijundu Kijiji cha Nyijundu, Kata ya Kakora Kijiji cha Kakora na Kitongo.

Maeneo mengine ni Kata ya Nyang'hwale Kijiji cha Nyang'hwale, Kata ya Bukwimba Kijiji cha Bukwimba, Kata Izunya Kijiji cha Sweya na Kata ya Kharumwa Kijiji cha Kharumwa na Busengwa.

Mkurugenzi wa kampuni ya urasimishaji ya Wide Chance Ltd, Ndg, Siyaone Likombe amesema zoezi hilo litawasaidia Wananchi kutatua migogoro ya ardhi baina yao na kuongeza thamani ya ardhi wanayoimiliki.

"Zoezi hili linaenda kuwaongezea Wananchi usalama wa umiliki wa ardhi yao kwa sababu mwisho wa zoezi hili Wananchi watakabidhiwa nyaraka za umiliki wa ardhi ambazo ni hati miliki za kimila" Amefafanua

Rai imetolewa kwa Wananchi kuchangamkia fursa hiyo kwa kutoa ushirikiano kwa makapuni hayo pindi yatakapofika kwenye maeneo yao kwa ajili ya utekelezaji wa zoezi hili.

Kaimu Mkurugenzi Ndg. Ezekiel Ntiriyo akiwa kwenye kikao cha kusaini Mkataba na Kampuni za Urasimishaji wa Makazi.