DC KINGALAME ATOA WITO KWA JAMII KUENDELEA KUWATUNZA WAZEE KWA HESHIMA NA UPENDO

Posted on: October 1st, 2025

Jamii imetakiwa kuendelea kuwathamini na kuwatunza wazee kwa heshima na upendo kwa kuwa Wazee ni tunu ya Taifa.

Hayo yameelezwa leo Oktoba 01, 2025 kwenye Kilele cha Maadhimisho ya Siku ya Wazee duniani yaliyofanyika Kiwilaya Katika Kijiji cha Kitongo, Kata ya Kakora.

Mkuu wa Wilaya ya Nyang'hwale Mhe. Grace Kingalame amewahimiza wazee wote kushiriki kikamilifu Uchaguzi Mkuu wa Rais, Wabunge na Madiwani na kujitokeza kwa wingi siku ya kupiga kura tarehe Oktoba 29, 2025.

Katika wakati mwingine Mhe. Kingalame amewaagiza Watendaji wa Kata na Vijiji kuendelea kusimamia zoezi la utambuzi wa Wazee wote Vijiji ili kurahisisha upatikanaji wa haki zao.

Afisa Ustawi wa Jamii Ndg. Kulthum Semgaya amesema kwa kuzingatia mchango mkubwa unaofanywa na kundi la wazee, Halmashauri ya Wilaya ya Nyang’hwale imeendelea kutekeleza miongozo, kanuni na maelekezo ya Serikali ya awamu ya sita inayoongozwa na Rais Dr. Samia Suluhu Hassan kupitia Wizara ya Maendeleo ya Jamii, Jinsia na Makundi Maalumu.

Amesema kwa kipindi cha miaka miwili jumla ya Wazee 4,002 wamepatiwa matibabu ya Msamaha ambapo kwa Mwaka wa fedha 2023/2024 jumla ya wazee 2,498 wamepata msamaha wa matibabu na Mwaka wa fedha 2024/2025 jumla ya waliopewa matibabu ya msamaha ni 1,504.

“Jumla ya mabaraza ya wazee 78 yameundwa, ikiwa mabaraza 15 yameundwa kwa ngazi ya kata, mabaraza 62 kwa ngazi ya vijiji na baraza moja kwa ngazi ya wilaya. Mabaraza hayo yanawawezesha wazee kujadili masuala yao mbalimbali ikiwemo changamoto zinazowakabili na namna ya kuzitatua” Ameeleza.

Pamoja na mambo mengine, Halmashauri ya Wilaya ya Nyang’hwale inatekeleza sera ya Wazee, na sera ya Afya zinazoelekeza kuwapa kipaumbele wazee katika maeneo yote ya kutolea huduma ikiwa ni pamoja na kutenga vyumba maalumu kwa ajili ya matibabu ya wazee.