DAS AWATAKA WAZAZI KULINDA WATOTO DHIDI YA UKATILI

Posted on: May 10th, 2025

Katibu Tawala wa Halmashauri ya Wilaya ya Nyang’hwale Ndg. Kaunga Omari kwa kushirikiana na Wananchi, leo Mei 10, 2025 ameshiriki katika Bonanza la Kupinga na Kutokomeza Ukatili lililofanyika katika viwanja vya sabasaba.

Akiwa katika bonanza hilo Ndg. Kaunga amewataka na kusihi Wazazi kuwalinda Watoto dhidi ya Ukatili mbalimbali, ambapo amesema Wazazi hawatakiwi kuwaamini wageni Majumbani ili kupunguza vitendo vya ukatili wa Kijinsia dhidi ya Watoto.

Aidha, Katibu Tawala amewataka Wazazi kupinga na kutokomeza ndoa za utotoni na mimba za utotoni ambapo amesema wazazi wana wajibu wa kuhakikisha vitendo vya ukatili vinaisha dhidi ya Watoto kuanzia ngazi ya Familia hadi Taifa.

Vilevile, amewataka Wazazi kuhakikisha wanalinda haki za Watoto ili kuwa na Taifa lenye uadilifu, Taifa lenye nguvu na Taifa lenye kujua wajibu wake.

Pamoja na mambo mengine Afisa maendeleo Kitengo cha Dawati la Msaada wa Kisheria Ndg. David Lucas amewasihi Wananchi na Jamii kwa ujumla kujiepusha kuwa kwenye mazingira ya kukatiliwa kwa kufanya vitu visivyokubalika katika jamii hasa kwa Watoto na Wanawake.

Kauli mbiu ya Kupinga na Kutokomeza Ukatili kwa mwaka 2025 inasema “Simama Dhidi ya Ukatili, Linda Haki za Wote.”