BARAZA MAALUM LIMEKETI KUJADILI HOJA ZA MDHIBITI NA MKAGUZI WA HESABU ZA SERIKALI (CAG)

Posted on: June 23rd, 2023

Baraza maaalum la Halmashauri ya Wilaya ya Nyang’hwale limeketi leo Juni 23,2023 katika ukumbi wa Halmashauri ya Wilaya ya Nyang’hwale kujadili hoja za mdhibiti na mkaguzi wa hesabu za serikali (CAG) za mwaka wa fedha 2022/2023.

Akiongoza baraza hilo, Mkuu wa mkoa wa Geita Mhe. Martine Shigela ameipongeza Halmashauri ya Wilaya ya Nyang’hwale kwa kupata hati safi kwa miaka mitatu mfululizo.

“Napenda kuipongeza Halmashauri yetu hii ya Nyang’hwale kwa kupata hati safi mwaka jana, mwaka juzi, na kwa miaka mitatu mfululizo, hongereni sana” Alisema Mhe. Mkuu wa Mkoa

“Taarifa zinaonyesha Halmashauri yetu inakusanaya vizuri, mwaka jana tulifanya vizuri kwenye mapato ya ndani zaidi ya malengo tuliyotakiwa kukusanya kwa kukusanya zaidi ya asilimia mia moja, na mwaka huu kabla hatujafika mwisho wa mwaka wa fedha, tuna zaidi ya asilimia 105%” Aliongeza.

Aidha Mkuu wa mkoa alielekeza watendaji wa Halmashauri kuongeza juhudi na mbinu mbadala katika kuhakikisha Halmashauri inaongeza kasi ya ukusanyaji mapato kwa kutumia  mbinu mbalimbali za ukusanyaji.

Aliagiza kuhuisha taarifa za idadi ya wafanya biashara kila wakati kwa kuwatumia watendaji wa vijiji, watendaji wa kata na madiwani. Orodha ya wafanya biashara  iwasilishwe kwenye Halmashauri ili kuhakikisha kila mfanya biashara anakata leseni ya biashara yake.

Mwenyekiti wa Halmashauri, Mhe. John I. John amemshukuru mkuu wa mkoa na kumhakikishia kuwa maelekezo yote aliyoyatoa wameyachukua na watayafanyia kazi kila mmoja kwa nafasi yake.