KATIBU TAWALA (W) AFUNGUA NYUMBA ZA WATUMISHI SHULE YA MSINGI MABOGO NA ZAHANATI YA KAFITA

Posted on: November 18th, 2025

Katibu Tawala Wilaya ya Nyang'hwale Ndg, Kaunga Amani leo Novemba 18, 2025 amefungua nyumba mbili za Watumishi wa Afya Zahanati ya kafita na Nyumba ya Mwalimu Shule ya msingi Mabogo.

Ujenzi wa nyumba hizo umetokana na mapato ya ndani ya Halmashauri ambapo Kila nyumba imegharimu kiasi cha Tsh. Milioni 50 pamoja na nguvu za Wananchi.

"Kipekee kabisa nikupongeze Mkurugenzi Mtendaji kwa kutenga fedha Kutoka Mapato ya ndani kwenye kuboresha Mazingira ya watumishi kuwa karibu na eneo la kutolea huduma, ambapo wananchi watapata huduma muda wote watakapohitaji" amesema Ndg, Kaunga.

Mwalimu Said Daniel amemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa kuendelea kuboresha mazingira ya kutolea elimu, kwa kuwa hapo awali alikua anatumia muda mrefu kufika kazini kutokana na umbali wa alipokua anaishi na Shule ilipo.

Mganga Mfawidhi wa Zahanati ya Kafita, Ndg. Yuda Eliud amesema kwa upande wake nyumba hiyo itamrahisishia kutoa huduma bora kwa Wananchi hasa kipindi usiku kwa kuwa atakua karibu na kituo chake cha kutolea huduma.

Kwa upande mwingine Katibu Tawala, amewataka Wananchi kushiriki kikamilifu kwenye miradi ya maendeleo inayoletwa na Serikali kwa kuchangia nguvu kazi au fedha. Hatua hiyo itawafanya Wananchi kuwa na umiliki wa miradi hiyo, hivyo wataweza kuilinda na kuitunza.