WAFANYAKAZI WA BANK YA CRDB NYANG'HWALE WAPEWA ELIMU YA KUJIKINGA NA MAGONJWA YASIYOAMBUKIZA

Posted on: November 12th, 2025

Kuelekea Kilele Cha Maadhimisho ya Wiki ya Magonjwa yasiyoambukiza, Novemba 15, 2025. Halmashauri ya Wilaya ya Nyang'hwale kupitia Idara ya Afya, Ustawi wa Jamii na Huduma za Lishe, imetoa Elimu ya Magonjwa yasiyoambukiza kwenye Taasisi za Umma, binafsi na Wananchi.

Elimu hiyo imetolewa leo Novemba 12, 2025 kwa Watumishi wa Benki ya CRDB Nyang'hwale, Shule ya msingi Samia, Shule ya Mchepuo wa Kingereza Kharumwa na Shule ya Sekondari Nyijundu.

Elimu hiyo imetolewa na wataalamu Kutoka Hospitali ya Wilaya ya Nyang'hwale wakiongozwa na Mratibu wa Magonjwa yasiyoambukiza Dkt, Zakia Mbulla.

Akizungumza wakati wa utoaji Elimu ya Magonjwa hayo Dkt, Zakia Mbulla amesema lengo la maadhimisho hayo ni kutoa Elimu na Huduma za uchunguzi wa Magonjwa yasiyoambukiza kwa Watumishi na Wananchi kwa ujumla ili kubaini mapema Magonjwa yasiyoambukiza kama vile kisukari, shinikizo la damu na uzito uliopitiliza.

Dkt, Zakia Mbulla amesema katika uchunguzi wa awali imebainika kuwa idadi kubwa ya watu wamekutwa na kiwango kikubwa cha Sukari sambamba na Shinikizo la damu, ambapo magonjwa haya yanasababishwa na mtindo wa maisha.

Kwa upande wake Afisa Lishe (W) Ndg, Somoe Bakari amesema tabia ya kula vyakula vilivyosindikwa viwandani husababisha ugonjwa wa Kisukari kwa sababu usindikaji wake unahusisha matumizi makubwa ya sukari.

Sambamba na hayo, Mratibu wa Elimu ya Afya kwa Umma, Ndg. Neema Mhoja amewashauri Watumishi kuwa na desturi ya kufanya mazoezi ambayo yanachangia kuondoa kiwango cha mafuta yaliyoganda mwilini na kuuweka mwili mbali na Magonjwa yasiyoambukiza.

Kilele Cha Maadhimisho hayo kitafanyika katika Uwanja wa Sabasaba Kharumwa kwa kufanya mazoezi ya viungo pamoja na Huduma za uchunguzi wa magonjwa ya Kisukari, Shinikizo la damu, Saratani ya shingo ya kizazi, huduma ya kinywa na meno pamoja na Hali ya lishe.