Jamii Nyang’hwale yatakiwa kuachana na mila zinazokwamisha Wanawake

Posted on: March 8th, 2019

Mkuu wa wilaya ya Nyang’hwale Mhe. Hamimu Gwiyama awataka wananchi wa wilaya hiyo kuachana na mila zinazodhoofisha maendeleo ya Wanawake na kuwasababishia kushindwa kujikwamua kiuchumi.

Ameyasema hayo leo alipokuwa akihutubia wanancnhi wa kijiji cha Kasubuya wakati wa maadhimisho ya siku ya Wanawake duniani ambapo yaliadhimishwa kiwilaya.

Aidha, ametolea mfano tabia ya wazazi kuoza Watoto wao mapema kwa lengo la kujipatia Ng’ombe ambapo amewasihi badala yake wawasomeshe kwa bidii Watoto wa kike kwani yeye atatoa Ng’ombe kwa kila mzazi ambaye mtoto wake wa kike atafaulu daraja la kwanza kwenye matokeo ya Kidato cha kwanza kuanzia mwakani.

Mhe. Gwiyama amesema Wanawake ni nguzo kubwa kwenye familia na kwa maendeleo ya Jamii kwa ujumla hivyo wakiwezeshwa wao utakua Msingi wa kuifanya Jamii nzima kufanikiwa zaidi.

Awali akimkaribisha Mgeni Rasmi kwa niaba ya Mkurugenzi Mtendaji wa Halmashauri ya Wilaya hiyo, Ndugu Elikana Lukuba alifafanua kuwa Halmashauri itaendelea kutoa mikopo isiyo na Riba kwa walemavu, Vijana na Wanawake ikiwa ni kuhakikisha anawajengea uwezo Jamii hiyo kufikia Uchumi wa kati.

Akisoma risala kwa niaba ya Wanawake Wilayani Nyang’hwale Bi, Josephine John alitaja Changamoto zinazowakabili Wanawake kushindwa kufikia Uchumi wa kati kuwa ni pamoja na miundombinu hafifu ya barabara, huduma duni za Afya pamoja na kukosekana kwa nishati ya Umeme vijijini.

Uhaba wa mitaji ya kuwakwamua kiuchumi pamoja na mila na desturi zinazowadhoofisha wanawake zilikuwa ni Miongoni mwa ajenda alizozielekeza msoma risala huyo kwa Mgeni Rasmi akihitaji msaada.

Bi Devota Kilenza kutoka shirika lisilo la kiserikali linalojihusisha na Wanawake na Watoto Plan International aliwasihi Wanawake Wilayani Nyang’hwale kujiunga kwenye vikundi vya VICOBA ambavyo vitawawezesha kupata mikopo na kuweza kuwa na Miradi ya ujasiriamali na kuwawezesha kujikwamua kiuchumi.

Maadhimisho hayo yalipambwa na vikundi mbalimbali vya Wanawake kujipatia zawadi za Fedha taslimu kutoka kwa Mgeni Rasmi kwa kujituma kwao kwenye shughuli mbalimbali za kujikwamua kiuchumi  wanazoonesha Wilayani hapo.