WANANCHI WATAKIWA KUJIANDIKISHA KWA WINGI KUELEKEA UCHAGUZI WA SERIKALI ZA MITAA.

Posted on: September 15th, 2024

Mkurugenzi Mtendaji wa H/W Nyang’hwale, Ndg. Husna Toni amewataka Wananchi kujiandikisha kwa wingi kwenye daftari litakalowawezesha kupata sifa ya kupiga kura kwenye Uchaguzi wa Serikali za Mitaa.

Ameyasema hayo jana Septemba 14, 2024 katika Kijiji cha Nyangurukuru Kata ya Nyang’hwale alipohudhuria mkutano wa uhamasishaji Wananchi kushiriki zoezi la Uchaguzi wa Serikali za Mitaa unaotarajiwa kufanyika ifikapo Novemba 27, 2024.

Mkurugenzi Mtendaji wa H/W Nyang’hwale, Ndg. Husna Toni akizungumza na Wananchi wa Kijiji cha Nyangurukuru

Mkurugenzi amesema kuwa kuelekea Novemba 27 kuna matukio mengi yalioelezwa kwenye Tangazo lililotolewa na Waziri wa Nchi Ofisi ya Rais Tawala za Mikoa na Serikali za Mitaa, Mhe. Mohamed Mchengerwa.

“Leo hii nimekuja kuwaeleza matukio mawili ambayo ni Uchaguzi wa Serikali za Mitaa ambao utafanyika Novemba 27, 2024 na uchaguzi huo utatangaliwa na zoezi la Wananchi kujiandikisha kwenye daftari la orodha ya wapiga kura” Amesema Mkurugenzi.

Amefafanua kuwa kadi ya mpiga kura itatumika tu kwenye uchaguzi mkuu mwakani 2025 lakini uchaguzi huu wa Serikali za Mitaa Wananchi wanatakiwa wakajiandikishe kwenye daftari kuanzia Oktoba 11 hadi Oktoba 20, 2024.

“Ili uwe na sifa ya kumchagua kiongozi umtakae kwenye uchaguzi huu wa Serikali za Mitaa ni lazima ukajiandikishe kwa muda wa siku kumi zilizotolewa kupitia Tangazo lililotangazwa na Waziri wa TAMISEMI Mhe, Mchengerwa” Amesisitiza Mkurugenzi.

Wananchi wa Kijiji cha Nyangurukuru wakisikilza Elimu ya uhamasishaji wa Uchaguzi wa Serikali za Mitaa

Afisa uchaguzi (W), Ndg. Dickson Msumari, pamoja na mambo mengine ametoa elimu kuhusiana na mambo mbalimbali yanahusu uchaguzi huo wa Serikali za Mitaa.

Uchaguzi wa Serikali za Mitaa 2024 unabebwa na kauli mbiu isemayo “Serikali za Mitaa, Sauti ya Wananchi, Jitokeze Kushiriki Uchaguzi”

Afisa Uchaguzi (W) Ndg. Dickson Msumari akitoa elimu ya mambo mbalimbali juu ya Uchaguzi wa Serikali za Mitaa