WANANCHI WAKABIDHIWA MRADI WA SHULE YA SEKONDARI BAADA YA KUKAMILIKA

Posted on: November 6th, 2024

Wananchi wa Kijiji cha Itetemia, Kata ya Nyabulanda, leo Novemba 06, 2024, wamekabidhiwa mradi wa Shule mpya ya Sekondari Itetemia 2024 baada ya ujenzi wa Shule hiyo kukamilika na kufunguliwa rasmi mapema Mwezi Julai, 2024.

Shule ya Sekondari Itetemia 2024 ilianza kujengwa kwa nguvu za Wananchi zenye thamani ya Tsh. Milioni 36 mpaka hatua ya boma, ndipo Serikali ikatoa fedha Tsh. Milioni 100 kukamilisha ujenzi wa Shule hiyo.

Mkurugenzi Mtendaji wa Halmashauri ya Wilaya ya Nyang’hwale, Ndg, Husna Toni amewapongeza Wananchi wa Kijiji cha Itetemia kwa kuona umuhimu wa kutatua changamoto ya watoto kutembea umbali mrefu kufuata huduma ya elimu na hatimae wakatafuta eneo na kuanzisha ujenzi wa Shule hiyo.

“Baada ya kuona jitihada za Wananchi, Serikali nayo ikaunga mkono juhudi hizo kwa kuleta fedha za mapato ya ndani ya Halmashauri Tsh. Milioni 25 na Serikali kuu ikaleta Tsh. Milioni 75 kwa ajili ya umaliziaji wa Shule hii” Amesema Mkurugenzi.

Diwani wa Kata ya Nyabulanda, Mhe, Masumbuko Kubora ameishukuru Serikali ya awamu ya sita kwa kuthamini jitihada zilizoanzishwa na Wananchi na hatimae Serikali kulepeleka fedha za ukamilishaji wa Shule hiyo.