MKUU WA WILAYA AMETEMBELEA MIRADI YA AFYA KATA YA MWINGIRO

Posted on: October 3rd, 2023

Mkuu wa Wilaya ya Nyang’hwale, Mhe. Grace Kingalame, akiwa na Kamati ya ulinzi na usalama (W) jana Oktoba 02, 2023 amefanya ziara ya kukagua maendeleo ya ujenzi wa miradi ya Afya na kufanya Mkutano wa hadhara katika kata ya Mwingiro.

Katika kuhakikisha serikali inatatua kero za Wananchi, Mkuu wa Wilaya ya Nyang’hwale amejidhatiti kuishi kwenye falsafa hiyo kwa kufanya ziara za mara kwa mara za kukagua miradi ya maendeleo na kusikiliza kero za Wananchi kwenye viunga vyote vya Wilaya ya Nnyang’hwale.

Mhe. Kingalame ametembelea mradi wa ujenzi wa Zahanati ya Nyamikonze, ambapo kwa sasa shughuli zinazoendelea ni kuboresha choo na bafu katika chumba cha kujifungulia, uwekaji wa miundombinu ya maji,ujenzi wa kinawia mikono na ujenzi wa kichomea taka.

Aidha, Mhe. Kingalame ametembelea ujenzi wa Zahanati ya Iyenze, ambapo kazi zinazoendelea kwa sasa ni pamoja na ukamilishaji wa ujenzi wa choo cha wagonjwa chenye matundu matatu, ujenzi wa kichomea taka na uzio.

Sambamba na hayo, ziara hiyo imetembelea ukamilishaji wa ujenzi wa Zahananti ya Mwingiro, ambapo sehemu kubwa ya shughuli nyingi zimekamilika, isipokua kwa sasa shughuli zinazoendelea ni upakaji wa rangi ndani ya jengo la mama na mtoto.

Pia, akiwa kwenye mradi wa ujenzi wa boma la nyumba za walimu katika shule ya Msingi Hussein Nassor iliyopo Kijiji cha Ng’wasabuka, Mhe. Kingalame amewapongeza wananchi hao kwa kuonesha juhudi za kuchangia miradi ya maendeleo.

Ziara hiyo ilimalizika kwa kufanya kikao cha ndani na Wazee wa Kijiji cha Ng’wasabuka na baadae mkutano wa hadhara na wananchi wa Kijiji hiko. Wananchi walipata fursa za kueleza kero zao na Mhe. Mkuu wa Wilaya kwa kushirikiana na wataalam kutoka Ofisi ya Mkurugenzi walizipatia ufumbuzi.