MKURUGENZI AKABIDHI VITENDEA KAZI VYA USAFI

Posted on: February 26th, 2025

Mkurugenzi Mtendaji wa H/W Nyang’hwale, Ndg, Husna Toni, leo Februari 26, 2025 amekabidhi vitendea kazi vya kufanyia usafi kwa vijana wanaofanya shughuli ya kufanya usafi katika maeneo mbalimbali ya mji wa Kharumwa na viunga vyake.

Miongoni mwa vifaa alivyokabidhi ni pamoja na mapipa 11 ya kuhifadhia taka, kofia ngumu tano, viatu pea tano, glaves ngumu pea tano, na Mavazi maalum (Kombati) matano.

Amesema lengo la kukabidhi vifaa hivyo ni pamoja na kuhakikisha mazingira yanakua safi na salama muda wote ili kuepukana na athari zinazoweza kusababishwa na uchafu unaozalishwa kutokana na shughuli mbalimbali za kiuchumi na uzalishaji.

Kaimu Mkuu wa Kitengo cha Usafi na Udbiti wa taka, Ndg, Ezekiel Ntiriyo amesema vifaa hivyo ikiwemo mapipa yataenda kuongezwa kwenye maeneo yenye mkusanyiko na biashara nyingi ili kurahisisha zoezi la ukusanyaji wa taka na usafishaji wa mji.

Ntirio ametoa rai kwa Wananchi juu ya matumizi sahihi ya vifaa hivyo (Mapipa) ambapo Wananchi wametakiwa kutokuweka taka hatarishi kama vile vitu vyenye ncha kali, mizoga ya wanyama, chupa za mikojo na pempas za Watoto.

Obadia Charles, ambae anafanya shughuli ya uzoaji wa taka ameishukuru Serikali kwa kuwapatia vifaa hivyo kwa kuwa vitawawezesha kufanya kazi kwa usalama na kujikinga na athari zitokanazo na shughuli hiyo ya uzoaji wa taka.