MAADHIMISHO YA SIKU YA MTOTO WA AFRIKA, NYANG’HWALE

Posted on: June 15th, 2023

Hafla za maadhimisho ya Siku ya siku ya mtoto wa Afrika yamefanyika leo Juni 15, 2023 katika Kijiji cha Nyashilanga, kata ya Nyabulanda, Wilaya ya Nyang’hwale. Maadhimisho hayo yamebeba kauli mbiu isemayo “Zingatia Usalama wa Mtoto katika Ulimwengu wa Kidigitali”

Hafla hiyo ilihudhuriwa na Mkurugenzi mtendaji wa Halmashauri ya Wilaya ya Nyang’hwale, Bi Husna Toni, akiambatana na Kamati ya Ulinzi na Usalama ya Wilaya, Viongozi mbalimbali wa vyama vya siasa, na wananchi kutoka maeneo mbalimbali.

Siku ya mtoto wa Afrika ambayo huadhimishwa ifikapo Juni 16 kila mwaka, ni miongoni mwa alama adhim na muhimu inayoendelea kuishi dahar katika historia ya maisha ya mtoto wa Afrika.

Historia hii inatukumbusha mapambano dhidi ukatili wa Watoto yaliyoasisiwa nchi ya Afrika ya Kusini, katika mji wa Soweto mnamo mwaka 1976. Aidha, mwaka 1991 Wakuu wa Nchi wanachama wa Afrika, kwa kipindi hiko (OAU), kwa sasa (AU), walianzisha siku ya mtoto wa Afrika ili kuyaenzi mapambano hayo.

Akizungumza katika maadhimisho hayo, Afisa Tawala Ofisi ya Mkuu wa Wilaya Nyang’hwale, Bw. Emmanuel Mnyonyi alisema, Watoto wana haki zao mbalimbali wanazostahili kuzipata kutoka kwa wazazi, walezi na jamii kwa ujumla.

Aidha, Bw. Manyonyi alianisha miongoni mwa haki hizo kuwa ni pamoja na haki ya kuishi, kupata elimu bora, afya bora, mavazi, na kusaidiwa katika kutekeleza majukumu yao ya kila siku.

“Wazazi na walezi kwa kushirikiana na serikali wahakikishe wanawalinda Watoto hawa dhidi ya vitendo mbalimbali vya ukatili dhidi yao. Tuwaepushe na ndoa za utotoni na kutumikishwa kwenye ajira za utotoni” Alisisitiza

“Tuwasimamie kwenye matumizi sahihi ya vifaa vya kielektroniki na matumizi sahihi ya mitandao ili kuwaepusha na ukatili wanaoweza kukumbana nao mitandaoni kama kauli mbiu ya mwaka huu inavyoelekeza” Alimalizia Bw. Manyonyi