DC KINGALAME ASISITIZA UBUNIFU NA UFANISI KWA WATUMISHI WA RUWASA NYANG'HWALE

Posted on: December 11th, 2025

Watumishi wa Wakala wa Maji na Usafi wa Mazingira Vijijini (RUWASA) watakiwa kufanya kazi kwa nidhamu na weledi ili kufikia azma ya serikali ya kumshusha mama ndoo kichwani, kwa kuhakikisha huduma ya maji inawafikia wananchi kwa wakati na kwa ubora unaostahili.

Ameyasema hayo Mkuu wa Wilaya ya Nyang'hwale Mhe.Grace Kingalame Jana Disemba 10, 2025 kwenye kikao cha nusu mwaka cha wadau wa maji na vyombo vya watoa huduma za maji katika Wilaya ya Nyang’hwale kilichofanyika katika Ukumbi wa Mikutano wa jengo la Utawala la Hospitali ya Wilaya ya Nyang’hwale.

Amabapo hali ya upatikanaji wa huduma ya maji vijiji vya Wilaya ya Nyang'hwale ni 77.4% ikiwa jumla ya vijiji 48 kati ya 62 vinapata huduma ya maji safi na salama kupitia vyanzo vya ziwa, visima vifupi na virefu, huku uhitaji wa maji wilaya ya Nyang'hwale ni mita za ujazo 9,263 kwa siku.

Jumla ya kiasi Cha Bilioni 1.8 zimetengwa kwa mwaka wa fedha 2025/26 kwa ajili ya upanuzi,utafiti na ukarabati wa miradi mbalimbali ikiwa ni pamoja na mradi wa Joint Water Project Partnership ( JWPP ) na chanzo Cha maji Cha Nyamtukuza.

Aidha, Mhe Kingalame ametoa wito kwa watumishi wa RUWASA Wilaya ya Nyang'hwale kutumia vizuri taaluma na ujuzi walionao katika kuwahudumia wananchi bila ubaguzi.

Kwa upande wake, Meneja wa RUWASA Wilaya ya Nyang’hwale Ndg Suzana Gogadi amewaomba wananchi kushirikiana na Serikali kwa kuilinda na kuitunza miundombinu ya maji ili huduma hiyo iendelee kupatikana kwa usalama na ufanisi katika maeneo yao.

Naye Mwenyekiti wa Chama Cha Mapinduzi (CCM) Wilaya ya Nyang’hwale Mhe Adam Mtole ameipongeza RUWASA kwa jitihada kubwa za kuhakikisha huduma ya maji inaboreka siku hadi siku, akibainisha kuwa kwa sasa upatikanaji wa maji wilaya ya Nyang'hwale umefikia asilimia 77.4%, hatua inayodhihirisha dhamira ya Serikali ya Awamu ya Sita katika kuboresha maisha ya wananchi.

Katika hatua nyingine, Mkuu wa Dawati la Elimu kwa Umma kutoka TAKUKURU, Ndg. Leticia George, amekumbusha Watumishi wa RUWASA kuepuka vitendo vya rushwa na kuhakikisha wanatoa huduma ya maji kwa haki na bila upendeleo wowote, ili kuimarisha imani ya wananchi kwa Serikali na taasisi zake.