DC KINGALAME AONGOZA KIKOA CHA TATHIMINI UTEKELEZAJI WA SHUGHULI ZA LISHE ROBO YA PILI OKTOBA - DISERMBA 2024

Posted on: January 30th, 2025

Mkuu wa Wilaya ya Nyang’hwale Mhe. Grace Kingalame Jana Januari 30, 2025 ameongoza kikao cha tathimini ya utekelezaji wa shughuli za Lishe kwa kipindi cha robo ya pili Oktoba – Disemba, 2024.

Afisa lishe (W) Ndg, Samoe Bakari ameeleza shughuli za Lishe zilizotekelezwa kwa kipindi cha robo ya pili ikiwa ni pamoja na ununuzi wa maziwa, sukari na mafuta yenye thamani ya Tsh million moja yaliyowezesha matibabu ya utapiamlo kwa Watoto waliolazwa Hospitali ya Wilaya.

Aidha, amesema ilifanyika shughuli ya kampeni ya utoaji wa matone na dawa za minyoo ya tumbo kwa watoto wenye umri chini ya miezi 6-59 katika vituo vyote vya kutolea huduma za Afya ambapo idadi kubwa ya watoto walifikiwa na kupatiwa huduma hiyo.

Kupitia maadhimisho ya Wiki ya magonjwa yasiyoambukiza, elimu kuhusiana na umuhimu wa kuzingatia lishe bora ilitolewa kwa makundi mbalimbali ya watu kwenye jamii na tathmini ya hali ya lishe ilifanyika kwa wananchi, Viongozi, Taasisi za umma ikiwemo TAKUKURU, Watumishi wa Halmashauri na Ofisi ya Madini.

Halikadhalika, katika kuhakikisha upatikanaji wa chakula shuleni, Halmashauri ilinunua kilo 640 za mbegu za mahindi na kuzikabidhi kwa Jumla ya shule 91 za msingi na sekondari ili kuondoa tatizo la utoro, kuongeza mahudhurio na hali ya ufaulu.

Sambamba na shughuli hizo, kitengo kimefanikiwa kununua na kusambaza chuma 20 za kuning’inizia mizani ya kupimia uzito wa Watoto na kufanya mafunzo wezeshi kwa Watoa huduma katika ufuatiliaji wa maendeleo na makuzi ya Watoto chini ya miaka 5.