ZOEZI LA UPANDAJI WA MITI 2,000 KANDOKANDO MWA MTO LIGEMBE

Posted on: March 25th, 2025

Mkuu wa Wilaya ya Nyang'hwale, Mhe, Grace Kingalame, leo Machi 25, 2025 ameongoza zoezi la upandaji wa miti 2,000 kandokando ya Mto Ligembe, Kata ya Kakora.

Akizungumza na Wananchi mara baada ya zoezi hilo, amesema huo ni muendelezo wa kutekeleza maelekezo ya Mhe, Dkt, Samia Suluhu Hassan, juu ya kupanda miti 1,500,00 kwa mwaka wa fedha 2024/2025.

Aidha, ameelekeza kuongezeka kwa kasi ya upandaji miti ili kufikia lengo hilo la kupanda miti 1,500,000 kabla ya kuisha kwa mwaka wa fedha 2024/2025.

"Duniani mabadiliko ya Tabia Nchi yanaleta athari nyingi sana, hivyo tukijihakikishia usalama wa mazingira yetu ni sawa na kuwa tumejihakikishia usalama wa maisha yetu" Amesisitiza

Afisa Misitu kutoka Ofisi ya Mkuu wa Mkoa wa Geita, Ndg, Tito Mlelwa, amempongeza Mhe, Kingalame na wataalamu kutoka Ofisi ya Mkurugenzi kwa kuwa mstari wa mbele kwenye swala la upandaji wa miti na uhifadhi wa mazingira.

Amesema mpaka hivi sasa Mkoa wa Geita umefanikiwa kupanda idadi ya miti 3,944,126 na katika idadi hiyo, Wilaya ya Nyang'hwale imepanda miti 426,312.

Zoezi la upandaji wa miti limefanyika kwa kushirikiana na Ofisi ya Mkuu wa Mkoa wa Geita, Bonde la Ziwa Viktoria na Ofisi ya Makamu wa Rais, Muungano na Mazingira.