ZIARA YA MADIWANI YA KUBADILISHANA UZOEFU NA HALAMSHAURI ZINGINE

Posted on: February 23rd, 2024

Waheshimiwa Madiwani wa Halmashauri ya Wilaya ya Nyang’hwale wakiongozwa na Mwenyekiti wa Halmashauri, Mhe. John I. John, Jana Februari 22, 2023 wamefanya ziara ya kubadilishana uzoefu katika Halmashauri ya Manispaa ya Kahama, Mkoani Shinyanga.

Ziara hiyo imejikita katika kuangazia utekelezaji wa miradi ya kimkakati, namna bora ya ukusanyaji wa mapato, uendeshaji wa kituo cha uwezeshaji wananchi kiuchumi, namna ya kuibua fursa za uwekezaji na utoaji wa huduma bora kwa Wananchi.

Msafara huo wa Waheshimiwa Madiwani ulipata fursa ya kutembelea maneo mbalimbali ya uwekezaji yaliyobuniwa na Halmashauri ya Manispaa ya Kahama kupitia Baraza la madiwani  la Manispaa hiyo.

Sehemu hizo ni pamoja na Jengo maalumu la wagonjwa wa nje (OPD) lilipo katika Hospitali ya Manispaa ya Kahama, ambapo jengo hilo limesheheni vifaa vya kisasa vya matibabu na huduma za kibingwa.

Wakiwa kwenye jengo hilo, Waheshimiwa madiwani walipata fursa ya kuingia kwenye wodi maalumu ya matibabu ya mazoezi tiba (Physiotherapy), ambapo wamejionea vifaa tiba maalumu na vya kisasa kwa ajili ya wagonjwa wenye matatizo ya viungo.

Aidha walipata fursa ya kutembelea eneo maalumu lililotengwa  kwa ajili ya shughuli za viwanda. Eneo hilo limetoa fursa kubwa kwa vijana kujiajiri kwa kufanya shughuli za ujasiriamali wa viwanda vidogovidogo na hata vikubwa. Shughuli hizo ni pamoja na  useremala, uhunzi, ufundi wa aluminium, uchomeleaji na nyingine nyingi.

Katika Jengo la Uwezeshaji Wananchi Kiuchumi, Waheshimiwa madiwani walipata kujionea namna ambavyo kituo hiko kinafanya kazi ya kuwajengea uwezo wajasiriamali na Wananchi kwa ujumla katika kuziendea fursa kupitia taasis mbalimbali zinazotoa huduma kwenye kituo hiko kama vile SIDO, TBS, VETA, TRA, na kadhalika.

Kituo hiko kinajumuisha huduma za utoaji wa mikopo yenye masharti nafuu, kuongeza thamani bidhaa zitokanazo na mazao ya kilimo, Ushauri wa kisheria na kibiashara, kuwajengea uwezo Wajasiriamali wadogo, wa kati na Wakubwa, na kuwaingiza kwenye soko la mnyororo wa thamani.

Waheshimiwa madiwani wamefurahishwa sana na kujifunza juu ya ubunifu wa Halmashauri ya Manispaa ya Kahama katika kuhakikisha inatoa huduma bora kwa Wananchi wake na inafikia lengo la ukusanyaji wa mapato kwa kiwango kikubwa.

Ziara hiyo itaendelea tena leo, Februari 23, 2024 Katika Halmashauri ya Wilaya ya Chato Mkoani Geita.