Wilaya ya Nyang’hwale yaweka Mkakati wa kupata Zahanati kwenye kila kijiji

Posted on: May 9th, 2018

Mkuu wa Mkoa wa Geita, Mhandisi Robert Gabriel ameendesha kampeni ya Ujenzi wa Zahanati kila kijiji Wilayani Nyanghwale kwa kushiriki Ujenzi za Msingi wa Zahanati ya Kijiji cha Nyan’holongo pamoja na kuchimba msingi wa Zahanati ya kijiji cha Izunya mapema leo asubuhi.

Mhe. Gabriel amewataka Viongozi wa Wilaya ya Nyang’hwale kutokaa Ofisini kwa sasa badala yake waende vijijini kuhamasisha Ujenzi wa Zahanati za Vijiji pamoja na shughuli zingine za Maendeleo. “Viongozi msikae maofisini kwa sasa ili hadi mwisho wa Mwezi mei kila kijiji kisicho na Zahanati kiwe kimeanzisha Ujenzi na hadi kufikia Mwezi Disemba vijiji vyote viwe vimepata Zahanati”, amesema Mhe. Mkuu wa Mkoa.

Mhe. Mkuu wa Mkoa amesisitiza kuwa Ilani ya Chama Cha Mapinduzi imeweka wazi nia ya kuboresha Huduma za Afya nchini ambapo inakusudia kuwa na Zahanati kwenye kila kijiji nchini, hivyo naye lazima atekeleze hilo.

Mhe. Mkuu wa Mkoa aliendesha Harambee ya Uchangiaji wa Ujenzi ambapo kijijini Ikangala walijitokeza wawekezaji wawili kutoka sekta ya Madini na kwa pamoja wakamuunga mkono Mkuu wa Mkoa kwa kutoa Matofali elfu moja (1000), Saruji mifuko mia moja (100) na wakaahidi kugharamia Gharama za madirisha ya kisasa ya Vioo na bati za Kuezekea jengo hilo. Wananchi mbalimbali, viongozi wa Serikali ya kijiji, Wakuu wa Idara kutoka Ofisi ya Mkurugenzi Mtendaji, Ofisi ya Chama Cha Mapinduzi na Kamati ya Ulinzi na Usalama walichangia Ujenzi huo kwenye vijiji vya Nyanh’holongo, Izunya, Ikangala na Nyakaswi.

Aidha, amekemea wananchi wenye tabia za kuwaficha waovu kwenye Jamii zao kama vile wavuta bangi, wanaotia Mimba Wanafunzi na waganga wanaoendesha Ramli chonganishi na kusababisha mauaji ya vikongwe na akaagiza waache tabia hiyo mara moja na ambaye ataendelea na tabia nhizo wananchi wamfichue ili ashughulikiwe kisheria.