WENYEVITI WA VIJIJI WATAKIWA KUTIMIZA MAJUKUMU BILA KUJALI TOFAUTI ZA KISIASA - DC KINGALAME.

Posted on: December 18th, 2024

Mkuu wa Wilaya ya Nyang'hwale Mhe.Grace Kingalame jana Desemba 17, 2024 amefungua mafunzo ya Uongozi kwa Wenyeviti waliochagulia katika Uchaguzi wa Serikali za Mitaa uliyofanyika Novemba 27, 2024.

Mafunzo hayo yamefanyika katika ukumbi wa jengo la Utawala la Hospitali ya Wilaya ya Nyang'hwale.

Akizungumza katika mafunzo hayo na Wenyeviti wateule Mhe. Kingalame amewataka Viongozi hao kutumia mafunzo hayo vyema kwenye kutekeleza majukumu katika Vijiji vyao bila kujali tofauti za Kisiasa ili kuweza kuleta maendeleo katika Vijiji hivyo.

Aidha mafunzo hayo yalijikita katika kuwakumbusha Wenyeviti wa Vijiji majukumu yao na majukumu ya Watendaji wa Vijiji ili kujua majukumu wanayopaswa kufanya katika Vijiji Vyao, pia walipewa elimu  ya Mapato ya kijiji ikiwa ni Ruzuku, michango ya Wananchi, Wafadhili pamoja na namnai ya kukusanya Mapato na namna ya kuibua Miradi kupitia Uibuaji wa fursa na Vikwazo ulioboreshwa (O&OD).

Vilevile timu ya Wakufunzi kutoka Chuo cha Serikali za Mitaa Hombolo Dodoma Ndg. Petro Nziku na Ndg. Boaz Mbundu wamewasisitiza Wenyeviti wa Vijiji wote kushirikiana na Watendaji wa Kata na Vijiji katika kuleta maendeleo na Ustawi wa Jamii inayowazunguka.

Pamoja na mambo mengine Afisa Uchaguzi Wilaya Ndg. Dickson Msumari ametumia fursa hiyo kuwapongeza Wenyeviti wote kwa kufanikiwa kushinda katika Uchaguzi wa Serikali za Mitaa uliofanyika Novemba 27, 2024 na kuwatakia utekelezaji mwema wa  majukumu yao kama walivyoaminiwa na Wananchi.