WAZAZI NA WALEZI WATAKIWA KULINDA HAKI ZA WATOTO

Posted on: June 16th, 2025

Wazazi na walezi wa Watoto katika Jamii wametakiwa kulinda haki za Watoto na kutimiza wajibu wao katika kujenga maisha ya watoto yanayoendana na mila na desturi za kiafrika.

Rai hiyo imetolewa leo Juni 16, 2025 na Mkuu wa Wilaya ya Nyang’hwale, Mhe, Grace Kingalame, akimuwakilisha Mkuu wa Mkoa wa Geita, Mhe, Martine Shigela kwenye Maadhimisho ya Siku ya Mtoto wa Afrika yaliyofanyika Viwanja vya Sabasaba Wilayani Nyang’hwale.

Watoto wakipita mbele ya Mgeni rasmi na mabango yenye jumbe mbalimbali

“Nitumie nafasi hii kuwakumbusha wazazi, walezi na watoa huduma wote kuwa ni wajibu wenu kutekeleza haki tano za msingi za mtoto ambazo ni Haki ya kuishi, kuendelezwa, kulindwa, kushirikishwa, na kutokubaguliwa” Amesema Mhe, Kingalame

Mtoto akikabidhiwa na zawadi na Mgeni rasmi

Ameeleza kuwa katika juhudi za kukabiliana na mmomonyoko wa maadili ni jukumu la jamii kuzuia ukiukwaji wa maadili mema kwa kuenzi mila, tamaduni na desturi zinazokubalika.

“Mila na desturi nyingi za kitanzania zinapaswa kutambuliwa na kuendelezwa kwa kuwa zina manufaa katika kulinda na kuendeleza maadili mema ya kitanzania” Amesema Mhe, Kingalame

Mwenyekiti wa Halmashauri, Mhe, John I. John akisema neno wakati wa Maadhimisho

Pamoja na mambo mengine ametumia fursa hiyo kuwasisitiza Wananchi kujitokeza kwa wingi kushiriki Uchaguzi Mkuu wa kumchagua Rais, Wabunge na Madiwani ifikapo Mwezi Oktoba.

Maadhimisho ya Siku ya Mtoto wa Afrika mwaka 2025 yamechagizwa na kauli mbiu isemayo "Haki za Mtoto:Tulipotoka,Tulipo na Tuendako”.