WATUMISHI WAPEWA SEMINA KUHUSU MAADILI YA UTUMISHI WA UMMA

Posted on: June 7th, 2023

Watumishi wa Halmashauri ya Wilaya ya Nyang’hwale wamepewa semina kuhusu umuhimu wa maadili ya Utumishi wa uma. Hayo yameelezwa jana Juni 6, 2023 katika ukumbi wa Halmashauri ya Wilaya ya Nyang’hwale.

Katibu Tawala Msaidizi Utawala na Rasilimali Watu kutoka Ofisi ya Mkuu  Mkoa Geita, Bw. Herman Matemu, alieleza maadili kuwa ni namna ya kufikiri kwa makini katika kufanya maamuzi kuhusu mema na mabaya. Alisema kuwa maadili ni turufu muhimu sana kwa mtumishi wa uma anayotakiwa kuishi nayo katika muda wake wote wa utumishi.

Bw. Matemu aliongeza kwa kuainisha viwango vya maadili vya kuzingatia kwa mtumishi wa uma kuwa ni pamoja na uadilifu, kuheshimu sheria, kuzingatia haki na kutopendelea, kuwa muwazi, uwajibikaji, uaminifu na ukweli, matumizi sahihi ya taarifa na kuepuka mgongano wa maslahi.

Aidha, Afisa TAKUKURU kutoka Ofisi ya Mkuu wa mkoa Geita, Bw. Said Lipunjage alielezea kuhusu umuhimu wa mtumishi wa uma kutojihusisha na vitendo vya rushwa. Pia alieleza baadhi ya makosa ambayo Mtumishi wa uma anapaswa kuepukana nayo ili asiangukie kwenye sheria inayohusiana na makosa ya rushwa.

Bw. Lipunjage aliongeza kwa kutaja baadhi ya makosa hayo kuwa ni Hongo, kutumia nyaraka kumdanganya mwajiri, rushwa ya ngono, kutumia mamlaka vibaya, kutoa maelezo ya uongo kwa Afisa wa TAKUKURU, kula njama ya kutenda au kutendeka kwa kosa na kujifanya Afisa TAKUKURU.

Bw. Matemu alimalizia kwa kuelezea umuhimu wa utunzaji na udhibiti wa taarifa na siri za ofisi. “Ili kuepuka madhara yanayoweza kujitokeza katika jamii, mtumishi wa uma anatakiwa ahakikishe anatunza taarifa zote za siri ambazo  zina hadhi ya kuwa ni siri za ofisi” Alisisitiza.