WATUMISHI AJIRA MPYA WAPATIWA MAFUNZO NA WAKUFUNZI KUTOKA TAASISI YA MAFUNZO YA SERIKALI ZA MITAA HOMBOLO

Posted on: February 19th, 2026

Watumishi wapya wa Halmashauri ya Wilaya ya Nyang'hwale wamepatiwa mafunzo maalum ya awali yaliyoendeshwa na wakufunzi kutoka Taasisi ya Mafunzo ya Serikali za Mitaa Hombolo, kwa lengo la kuwajengea uwezo.

Watumishi hao wamekumbushwa kufanya kazi kwa kuzingatia sheria, kanuni na taratibu za Utumishi wa Umma, huku wakisisitizwa kuepuka vitendo vya rushwa na ubadhirifu wa mali za umma.

Wakufunzi wameelezwa kuwa uadilifu na uwajibikaji ni msingi wa kujenga imani kwa Wananchi na kuimarisha utendaji kazi serikalini.

Aidha, washiriki wamepata elimu kuhusu muundo wa Serikali za Mitaa, majukumu yake na namna inavyofanya kazi katika ngazi mbalimbali za utawala.

Pia, wamehamasishwa kujiunga na vyama vya wafanyakazi kama Chama cha Walimu Tanzania (CWT), Chama cha Wafanyakazi wa Serikali za Mitaa Tanzania (TALGWU), na Umoja wa Wafanyakazi wa Serikali na Afya Tanzania (TUGHE) kwa ajili ya kulinda na kutetea maslahi yao kazini.

Vilevile, wamepatiwa ufafanuzi kuhusu umuhimu wa kujiunga na Mfuko wa Hifadhi ya Jamii kwa Watumishi wa Umma (PSSSF) na mafao mbalimbali yanayopatikana kupitia mfuko huo, ikiwemo mafao ya uzeeni, ulemavu na warithi.

Kwa ujumla, watumishi hao wametakiwa kuwahudumia wananchi kwa kuzingatia maadili ya Utumishi wa Umma, wakitambua kuwa wao ndio sura ya Serikali katika maeneo yao ya kazi.