WATENDAJI WA VIJIJI WATAKIWA KUIMARISHA UTOAJI WA HUDUMA KWA WANANCHI

Posted on: February 14th, 2026

Mkurugenzi Mtendaji wa Halmashauri ya Wilaya ya Nyang'hwale, Bi. Husna Toni, Februari 14, 2026 amekutana na Watendaji wa Vijiji katika ukumbi wa mikutano wa Halmashauri kwa lengo la kusisitiza uwajibikaji na kuimarisha utoaji wa huduma kwa wananchi.

Mkurugenzi Mtendaji Bi. Husna Toni akizungumza na Watendaji wa Vijiji

Katika kikao kazi hicho, Mkurugenzi ametoa maelekezo mahsusi yanayolenga kuongeza ufanisi na kuleta matokeo chanya katika ngazi ya vijiji.

Akizungumza kwa msisitizo, Bi. Toni amewataka Watendaji wa Vijiji kusimamia na kutekeleza ipasavyo maelekezo yanayotolewa na Serikali ili kuhakikisha wananchi wanapata huduma bora na kwa wakati.

Watendaji wa Vijiji walisikiliza maelekezo kutoka kwa Mkurugenzi Mtendaji

Amesema watendaji hao ni wawakilishi wa Serikali katika maeneo yao, hivyo wanabeba taswira na heshima ya utendaji wa Serikali mbele ya jamii.

Aidha, amewahimiza kuwa wabunifu katika kubuni na kuibua vyanzo vipya vya mapato ndani ya maeneo yao ya utawala, hatua itakayosaidia kuongeza mapato ya ndani na kuimarisha utekelezaji wa miradi ya maendeleo.

Mkurugenzi amesisitiza kuwa ubunifu na uwazi katika ukusanyaji wa mapato ni nguzo muhimu ya maendeleo endelevu.

Mtendaji wa Kijiji akichangia mada wakati wa kikao kazi cha Watendaji

Katika hatua nyingine, Mkurugenzi amewataka watendaji kushughulikia kwa dhati changamoto ya utoro shuleni kwa kushirikiana na wadau wa elimu, pamoja na kuhakikisha wanafunzi wanapata chakula shuleni ili kuongeza mahudhurio na ufaulu.

Sambamba na hilo, amesisitiza umuhimu wa lishe bora kwa kuhamasisha matumizi ya mashine za kuchanganya virutubishi kama njia ya kuboresha afya za Watoto na Wananchi kwa ujumla.

Vilevile, ameelekeza kujazwa na kuhuishwa mara kwa mara kwa daftari la makazi katika kila kijiji, akibainisha kuwa nyenzo hiyo ni muhimu katika kuimarisha ulinzi na usalama.

Hatua hizo kwa pamoja zinatarajiwa kuongeza uwajibikaji, kuimarisha utendaji wa watumishi na kuleta maendeleo chanya kwa wananchi wa Wilaya ya Nyang’hwale.