WATENDAJI WA KATA WATAKIWA KUSIMAMIA UANDAAJI WA MASHAMBA YA SHULE KUELEKEA MSIMU WA KILIMO

Posted on: September 16th, 2025

Katibu Tawala (W) ya Nyang'hwale, Ndg. Kaunga Amani leo Septemba 16, 2025 ameongoza kikao cha Tathimini ya Mkataba wa Lishe kwa kipindi cha robo ya nne kuanzia Mwezi Aprili hadi Juni, 2025 kilichofanyika katika ukumbi wa Ofisi ya Mkuu wa Wilaya.

Akiwa katika kikao hicho Katibu Tawala amewataka Watendaji wa Kata kwa kushirikiana na Walimu kusimamia uandaaji wa Mashamba ya Shule kuelekea msimu wa Kilimo ili Wanafunzi waweze kupata Chakula Shuleni.

Aidha, Amemuagiza Afisa Kilimo (W) Ndg. David Mabula, kuhakikisha unafanyika uzalishaji wa kutosha wa mbegu za viazi Lishe ili Shule zote ziweze kupata Mbegu hizo kwa uhakika na zinazojitosheleza.

(Katibu Tawala  wa Wilaya ya Nyang'hwale Ndg Kaunga akitoa Maelekezo katika kikao cha lishe kwa kipindi cha robo ya nne)

Afisa Lishe Ndg. Furaha Nicholaus amesema shughuli mbalimbali zimefanyika ikiwemo kutoa elimu ya Lishe juu ya mtindo bora wa maisha na ulaji unaofaa kwa Watumishi 11 wa TAKUKURU.

Ameongeza kuwa, yamefanyika Maadhimisho ya Siku ya Afya na Lishe ya Kijiji (SALIKI) ambapo Wataalamu wametoa elimu sahihi ya kuwaandalia Watoto chakula chenye virutubishi na umuhimu wa kunyonyesha maziwa ya Mama kwa Watoto yaliyofanyika katika cha Nyakaswi, Nyang'hwale na Ibambila.

(Katibu Tawala Ndg Kaunga akiwa akisikiliza maoni ya Wajumbe kwenye kikao cha lishe kwa kipindi cha robo ya nne)

Halikadhalika, kampeni ya utoaji wa Matone ya Vitamin A na dawa za minyoo ya tumbo kwa Watoto wa umri miezi 6-59 imetolewa ambapo jumla ya Watoto 45,806 wamefikiwa katika Vituo vyote vya kutolea huduma.

Pia, kitengo kimeendelea kusimamia Club za Lishe katika Shule za Sekondari ambapo Shule mbili za Sekondari ya Kanegele na Kharumwa zilitembelewa kwa ajili ya kuhamasisha uanzishwaji na uendeleaji wa huduma za Chakula Mashuleni.