WATAALAMU WA LISHE WATOA ELIMU YA LISHE BORA

Posted on: June 14th, 2023

Lishe bora ni miongoni mwa sehemu muhimu ya kuzingatiwa katika maisha ya ukuaji wa binadamu. Kimsingi, Lishe Bora ni hali inayotokana na kula mlo kamili na wa kutosha wenye mchanganyiko wa vyakula kutoka katika makundi matano ikiambatana na mazoezi ya mwili.

Zoezi la uelimishaji wa maandalizi ya lishe bora na afya ya chakula limefanyika katika Kijiji cha Nyugwa, Kata ya Nyugwa, katika Halmashauri ya Wilaya ya Nyang’hwale. Zoezi hilo limefanyika leo Juni 14,2023 likisimamiwa na Wataalamu wa lishe kutoka Hospitali ya Wilaya ya Nyang’hwale.

Zoezi hilo limehusisha otoaji wa chanjo ya Vitamin A na upimaji wa lishe kwa Watoto, upimaji wa shinikizo la damu (BP) na sukari kwa wazee kuanzia miaka sitini na kuendelea. Pia wataalamu wa lishe walitoa elimu ya kuandaa uji wa lishe hatua kwa hatua kwa ajili ya Watoto.

Afisa Lishe kutoka Hospitali ya Wilaya ya Nyang’hwale, Bw.Tibendakwingana Francis, alieleza kuwa lishe bora inaimarisha afya ya mwili na afya ya akili kwa mtoto. Aliongeza kuwa, lishe bora husaidia hatua za makuzi ya mtoto ili kuendana na umri alionao na kupunguza athari za utapiamlo na udumavu

“Lishe bora inapatikana kwa kula chakula kwa kuzingatia makundi matano ya chakula na mtoto kunywa uji wenye angalau makundi matatu ya chakula. Makundi hayo ni (vyakula vya asili ya Wanyama na jamii ya mikunde), (mbogamboga), (matunda), (Mafuta, sukari na asali), na (mazao ya nafaka, mizizi, na ndizi mbichi)”, alisisitiza

Mwenyekiti wa Kijiji hiko cha Nyugwa aliwashukuru wataalamu hao wa lishe kwa kutumia muda wao kuwapa elimu wananchi wa kijiji hiko na maeneo ya jirani. Amesema kuwa elimu hiyo itasaidia kupunguza athari zitokanazo na uhaba wa elimu hiyo katika jamii.