WASIMAMIZI WA MIRADI YA TASAF NGAZI YA JAMII WAPATIWA MAFUNZO

Posted on: March 14th, 2025

Mratibu wa Miradi ya TASAF (W) Ndg. Samwel Morango leo Machi 12, 2025 ameratibu mafunzo ya usimamizi wa miradi ya kuondoa Umasikini (TPRP IV) kutoka Mfuko wa Maendeleo ya Jamii (TASAF) kwa Kamati ya Usimamizi wa miradi ngazi ya Jamii (CMC) katika Kata za Shibalanga, Shabaka, Kakora na Nyugwa.

Wakiwa kwenye mafunzo hayo Wasimamizi wamefundishwa mbinu mbalimbali zitakazowajengea uwezo wa usimamizi na utekelezaji wa Shughuli za maendeleo ya miradi hiyo.

Mchumi kutoka Ofisi ya Mipango Ndg. Jacob Mahimbo ameeleza kuwa jukumu lao ni kuandaa mpango wa utekelezaji na makadirio ya gharama za miradi, kuandaa mpango wa manunuzi, kuafanya vikao vya kamati vinavyohusu uendeshaji wa miradi na kufanya manunuzi ya vifaa na huduma zinazohitajika wakati wa utekelezaji miradi.

Aidha, Afisa Maliasili Ndg. Michael Mbaga amesema baada ya mradi kukamilika Wasimamizi wa mradi wanatakiwa kupanda miti, kusawazisha eneo na kuhakikisha kuna matumizi bora ya Ardhi ili kukabiliana na athari za kimazingira zilizojitokeza wakati wa utekelezaji wa mradi.

Vilevile Mhandisi wa Ujenzi Ndg. Paulo Matundwe ameelekeza namna ya kuandaa bajeti ili kurahisisha zoezi la kusimamia miradi hiyo ambapo amesema Kamati ya usimamizi inapaswa kuratibu mipango ya manunuzi, kupanga mahitaji ya usafiri, Vifaa, Mitambo, pamoja na kufahamau bei za vifaa na nguvu kazi.